La FSA-PSOE ponse nerviosa col sofitu que recibe la oficialidá

La FSA-PSOE entama a ponese nerviosa col xorrecer de los manifestamientos favoratibles a la oficialidá dende la drecha y la izquierda a la que vieno xuntase esti día l’alcalde d’Uviéu y pide-y al PP qu’esclarie la so postura sobre l’asturianu y si quier “trespasar la llende de la cooficialidá”.

El secretariu d’Organización de la FSA-PSOE, Jesús Gutiérrez, pidió esti miércoles 28 al Partíu Popular qu’esclarie la so postura en relación a la cooficialidá de la llingua asturiana. Gutiérrez pidió a los ‘populares’ asturianos que respuendan si “defienden la cooficialidá o non”. Gutiérrez refirióse, sigún espublizaba Europa Press, a les “ambigües” declaraciones del alcalde d’Uviéu, Gabino de Lorenzo, quien apeló a una mayor protección de la ‘llingua’ y dempués de que’l conceyal de Cultura del Conceyu participara nuna marcha a favor de la oficialidá. “Nun val escondese detrás de fórmules como más apoyu, porque la FSA-PSOE quier un apoyu máximu a la llingua asturiana”, dixo Gutiérrez, quien s’entrugó si “l’alcalde d’Uviéu y el presidente del PP d’Asturies quieren trespasar la llende de la oficialidá o non”.

Jesús Gutiérrez entrugó al alcalde si’l so conceyal de Cultura representaba al Conceyu o al equipu de Gobiernu municipal na marcha pola oficialidá del pasáu sábadu. “¿Ta l’alcalde d’alcuerdu col so conceyal o non?¿Representa les posiciones del PP o non?”, señaló Gutiérrez nun comunicáu colgáu na páxina web de la FSA-PSOE, “porque la conseña de la marcha nun falaba d’apoyu al asturianu, sinón d’oficialidá del asturianu”.