“La Frontera”, “Obús” o Ariel Rot artistes convidaos en La Vega pal 24º Concursu de Rock

“La Frontera”, “Obús” o Ariel Rot artistes convidaos en La Vega pal 24º Concursu de Rock
18 ochobre 09:33 2021 Imprimir

La conceyalía de Festexos celebra’l 24º Concursu de Rock Ciudá d’Uviéu Alejandro Blancu ”Escayu” pa impulsar la promoción y espardimientu de grupos y solistes asturianos de música pop-rock y “La Frontera”, “Obús” o Ariel Rot van ser dellos de los artistes convidaos.

La fábrica de La Vega va acoyer la XXIV edición d’esti certame mientres los díes 5, 6, 7, 12 y 13 de payares, con trés concursantes en cada xornada. Caúna d’elles va tar acompañada pola actuación d’un artista o grupu consagráu. Festexos contrató a “Obús” pal día 5; “Tierra Santa”, el día 6 y “Neo”, el día 7. La segunda fin de selmana de’l certame van xubir a les tables, como artistes invitaos, “La Frontera”, el día 12 y “Tafuros maniegos”, el día 13, tres l’actuación de “Brea”, ganadores de la edición anterior.
El dia 14, antes el fallu del xuráu y l’entrega de premios, ta prevista l’actuación de Ariel Rot, a les 19.30 hores.

L’accesu a tolos conciertos ye gratuitu hasta completar aforu. Toles sesiones del concursu van arrincar a les 20 hores y de siguío, en redol a les 21.45 hores van xubir a les tables los artistes invitaos.

La inscripción al concursu ta abierta, hasta’l día 23 d’ochobre, pa cualquier grupu o solista establecíu nel Principáu d’Asturies, que “na actualidá nun tengan contratu discográficu a valir” y “pueda acreditar la residencia, en dalgún conceyu asturianu, de siquier la metá de los componentes de la formación (en casu de ser un grupu) o del solista”.

Los participantes compiten por trés premios. El ganador va recibir 6.000 euros, amás del compromisu d’ufiertar, siquier, una actuación nes fiestes de San Mateo del próximu añu, nel espaciu que determine la organización. El segundu premiu tien xuna cuantía de 3.600 euros y el terceru, 2.400 euros.

Les inscripciones podrán realizase por aciu rexistru electrónicu nel portal del ciudadanu de la web del Conceyu d’Uviéu y, de forma presencial, nel rexistru municipal del Conceyu d’Uviéu. Nel supuestu d’optar por esta opción ye necesaria la solicitú de cita previa. https://www.oviedo.es/citaprevia
Tola información en https://tinyurl.com/yt357b7t

  Categories: