La fonte de Rúa ye d’aniciu tardorromanu, acordies col primer análisis fechu pol métodu del Carbonu 14

L’orixe de la fonte atopada nes obres d’escavación que se tán faciendo p’ampliar el Muséu de Belles Artes d’Asturies, n’Uviéu, podría remontase al sieglu IV, acordies col primer análisis de los restos fechu col métodu del Carbonu 14 nun llaboratoriu de Florida (EEUU). El Director Xeneral de Patrimoniu Cultural, José Adolfo Rodríguez Asensio, y el responsable de les escavaciones arqueolóxiques, Rogelio Estrada, informaron güei al mediudía sobre los resultaos d’estos análisis que contribuyeron a contestualizar lo que s’atopó nel solar dende’l puntu de vista cronolóxicu.

La Conseyería de Cultura y Turismu va encargar un nuevu estudiu científicu de los restos de la fonte pa contrastar la sorprendente datación del morteru de la construcción, fecháu ente los años 240 y 420 dempués de Cristu.

Hasta agora procesáronse cuatro muestres de diferentes niveles estratigráficos:

•

- La primera correspuende a carbones recuperaos baxo les cuñes d’anclaxe d’ún de los furacos de poste. La so cronología asítiase, con un 95% de probabilidá, ente los años 1040 y 1260.

•

- La segunda muestra garróse d’un sedimentu que sellaba’l canal del bloque de piedra. Asítiase, con un 95% de probabilidá, ente los años 650 y 780.

•

- La tercera muestra garróse d’un morteru hidráulicu. La so datación asítiase, con un 95% de probabilidá, ente los años 240 y 420.

•

- La cuarta muestra garróse d’una brizna carbonosa atopada embaxo’l mentáu bloque. La so datación asítiase, con un 95% de probabilidá, ente los años 1220 y 1290.

Acordies colos espertos, les tres primeres feches son absolutamente concordantes cola sucesión lóxica del rexistru estratigráficu documentáu, al que define la superposición d’estructures y depósitos. Por embargu, la cuarta fecha podría tar invalidada porque ye más moderna que los depósitos que la cubren. “Nesti casu, esiste una contaminación, probablemente d’una raíz, qu’invalida la muestra”, dixo Rogelio Estrada. En cualquier casu, la Conseyería de Cultura y Turismu camentó necesariu facer otru análisis científicu de dalgunos restos pa contrastar la sorprendente fecha del morteru de la construcción, asitiada acordies colo espuestu, na época tardorromana.

Les escavaciones arqueolóxiques, que tán en fase mui avanzada y podríen finar nel plazu d’un mes, permitieron documentar relevantes depósitos d’Época Baxomedieval y Moderna que sellaben una serie d’estructures de periodos anteriores. Son precisamente éstes les qu’algamen un mayor interés dende’l puntu de vista científicu. Pero lo más significativu foi atopar la fonte de Rúa. Ésta aprovechaba un manantial que sorprendentemente entá caltién güei un nivel freáticu estable. Esta fonte tien 2,2 metros de llargor por dos metrs d’anchor nes entalladures de les paredes. Consérvase perfectamente la pieza de captación d’agua y tol canal, que tien 8,5 metros de llargor entalláu na roca. La fonte ye asemeyada a la de Foncalada, magar que de dimensiones menores.

Acordies con Rodríguez Asensio, esti descubrimientu ye “mui importante dende’l puntu de vista históricu. Hasta güei la historia d’Uviéu taba fecha a partir de documentos pero nos últimos años l’arqueoloxía punxo importantes materiales enriba la mesa y ésti ye ún d’ellos”. Pal Director de Patrimoniu Cultural, esti descubrimientu tamién va contribuyir a “arriquecer” el “ambiciosu” proyectu d’ampliación del Muséu de Belles Artes d’Asturies. “Esto ye un regalu; tamos siendo mimaos pola fortuna arqueolóxica”, sorrayó’l Director.