La foguera de San Xuan prendió Asturies

Redacción.

Comas, Gatos del Fornu y Nuberu actuaron en Llugones, onde se prendió la VIII Foguera de San Xuan de Llugones a partir de les 22.30 hores nel parque de La Paz. La programación del sábadu arrancó a les siete la tarde con una exhibición de deporte rural a cargu del club Seis Conceyos de Sariegu. En Ribeseya fízose una gran foguera de 18 tonelaes de madera en plena ría del Seya. Los presentes baillaron la danza prima al ritmu de la Banda de Gaites de Gozón.

En Xixón, los actos van entamar pela mañana coles actuaciones de grupos folclóricos nel Paseu de Begoña, La Plazuela, Plaza Xixón-Sur y nos Xardinos de la Reina. A les 21:00 va enramase la fonte de Pelayo, a cargu d’Endecha de Cultura Tradicional ‘Na Señardá’. A les 10 de la nueche va haber un pasacais de la Banda de Gaites Villa de Xixón y otru de Noega. A les once va haber un conciertu de Los Ciquitrinos en Poniente, siguíu de la tradicional foguera y un espectáculu pirotecnicu con danza prima.

N’Aviles, la foguera por antonomasia va ser la instalada na redolada del banzáu de Trasona, va ser la replica d’una pirámide de Tikal, utilizada nel so tiempu polos mayes. Dempues va baillase la Danza Prima y van tocar el grupu bretón David Pasquet, Skanda y la banda asturiana Na Zona.

Otra referencia va ser la foguera de Llaranes, que va cuntar con una serie d’actos como dos charres, organizaes pola Asociación de Vecinos El Camín de Llaranes-El Pozón, embaxo’l títulu ‘La maxa de la nueche de San Xuan (mitoloxía asturiana)’ por Teresa Gutierrez.