La FMC de Xixón convoxa un nuevu cursu de doblaxe

La FMC de Xixón convoxa un nuevu cursu de doblaxe
14 xineru 10:45 2016 Imprimir

Entamáu pola Universidá Popular de Xixón con Gonzali Producciones vieno acabante de convocase un nuevu Cursu Práuticu de Doblaxe, integráu dientro de la programación pal semestre primeru de 2016 d’esti departamentu de la Fundación Municipal de Cultura.

Esti segundu cursu va desarrollase nel Centru de Cultura Antiguu Institutu (cai Jovellanos 21) y nos locales de la productora (cai Libertad 12, entesuelu C). Consta de 40 hores, con sesiones de llunes a vienres y horariu de 16 a 20:30, empezando’l 7 de marzu. Ufierta unos conteníos que se dividen en nueve capítulos: Respiración, Espresión Verbal, Dicción, Interpretación, Proyeición de la voz ante’l micru, Sincronización, Sonorización ante’l micru, Téunica de doblaxe, Llectura espresivo y Mímesis.

Fadránse exercicios de doblaxe sobre fragmentos de series y películes en toles sesiones. Daráse diploma d’asistencia a aquelles persones que lu pidan y asistieren a lo menos al 80% de les sesiones.

Los conteníos va impartilos l’actriz Ana Blanco Rozada, encargándose del apoyu técnicu Illán Gonzali. Ana Blanco Rozada ye titulada nel ITAE de Xixón. Actuó en series televisives bien conocíes, como Amar en tiempos revueltos, 7 Vidas, Mis Adorables Vecinos, Compañeros y Policías, ente otres, amás d’en trabayos cinematográficos y numberoses representaciones teatrales. Como actriz de doblaxe formóse con Salvador Arias, trabayando nesta faceta en bien de títulos audiuvisuales de toa triba. Con Gonzali Producciones tien participao en dellos versionaos cinematográficos en llingua asturiana, siendo’l más recién Harry el suciu.

Esti cursu, que ta encamentáu a persones con della esperiencia n’interpretación y/o llocución, tien como plazu de matrícula del 19 de xineru al 5 de febreru. Gonzali Producciones vien faciendo dende 2010 doblaxes en castellanu, asturianu y gallego-asturianu; ente otro la serie d’animación Les Aventures de Superman y los llargumetraxes Los viaxes de Gulliver, El tercer home, McLintock, La nueche de los muertos vivientes, El rostru impenetrable y Harry el suciu, éstos dos últimos emitíos na Televisión del Principáu d’Asturies.

La xente interesao pue informase nes webs de la Universidá Popular  y de la Escuela de doblaxe d’Asturias.

Loading Facebook Comments ...