La final de FestiAMAS da protagonismu a la música d’Asturies en San Mateo

La final de FestiAMAS da protagonismu a la música d’Asturies en San Mateo
10 setiembre 09:16 2022 Imprimir

La Corredoria va ser escenariu, esti domingu 11 de setiembre, de la fase cume del concursu FestiAMAS al que lleguen siete de los 187 grupos participantes nesta décima edición.

La conceyala de Festexos del Conceyu d’Uviéu, Cuadonga Díaz, xuntu al coordinador del festival, Luis Serrano; la directora d’Antena de RTPA, Lucía Herrero; y la directora de Marketing de Caxa Rural d’Asturies, Nuria Meana, promocionaron esta selmana la final de FestiAMAS que na so décima edición va tener como escenariu la plaza del Conceyín, na Corredoria. Va ser el domingu 11 de setiembre. Ellí van dase cita los siete finalistes del concursu: Mónica Moráu, Mostru l’Horru, Triple Malta, Amazing Rescamplu, Fer Iglesias, Los Maniseros y Magdalene Blue.

Cuadonga Díaz, responsable de Festexos, recordó que “FestiAMAS, el concursu musical impulsáu polos Premios AMES ocupa un llugar preferente na programación musical de San Mateo”. Señaló coles mesmes que l’equipu de gobiernu municipal “tien un compromisu serio y sincero cola cultura; tamién, como nun puede ser d’otra manera, cola música asturiana. Esta final de FestiAMAS volverá ser tou un ésitu y la constatación de que la música fecha n’Asturies gocia d’una escelente salú”.

Esi diagnósticu sobro la música asturiana foi compartíu tamién por Luis Serrano, coordinador del festival, quien destacó coles mesmes que “FestiAMAS ye unu de los concursos más multitudinarios de música que se faen n’Asturies. Más d’un millar de grupos inscribiéronse a lo llargo de los sos 10 ediciones, de los que s’editaron 6 discos“. Los finalistes d’esta décima edición representen “tol abanicu d’estilos musicales que se faen n’Asturies, siempres con temes propies”.

Ye una característica esencial del festival, dada la so finalidá de “visibilizar al máximu la escena musical asturiana y los sos grupos emerxentes”, como señaló mientres la presentación Lucía Herrera, directora d’Antena de RTPA: “el concursu, emitíu los sábados por TPA a les 23:30, va llegar a la so final televisiva’l sábadu 24 de setiembre”.

Dende’l llau de los patrocinadores, Nuria Meana, directora de Marketing de Caxa Rural d’Asturies felicitó a la organización, al conceyu uvieín y la RTPA pol sofitu y espardimientu d’esti eventu cultural, yá que “na rexón hai talentu, cultura y fuerza qu’hai que sacar acaldía poconín, ente toos”.

Na final cada formación va tener 30 minutos sobro l’escenariu pa demostrar la so valía. Los siete grupos yá llograron el premiu de la publicación d’un single a nivel mundial en toles plataformes dixitales. Al grupu ganador va publicáse-y, amás, un discu neses plataformes, del que tamién se fadrá una grabación.

  Categories: