La filosofía y la ética van volver al institutu por iniciativa del Congresu

Les materies de ‘Filosofía’ y ‘Hestoria de la filosofía’ van ser comunes y obligatories pa los alumnos de secundaria y bachilleratu, gracies a l’aprobación por unanimidá de la proposición non de llei relativa a la considerancia de los estudios de filosofía na enseñanza secundaria y el bachilleratu.

Con esta iniciativa del Congresu, presentada por Podemos, pretende diseñase un currículum común pa tol sistema educativu non universitariu, que sía coles mesmes estable y flexible nos conteníos. D’esta manera l’asignatura de Filosofía, «imprescindible pa desenvolver el pensamientu autónomu y críticu en que se funda la democracia» tea presente nos trés últimos cursos de la enseñanza secundaria: 4º d’Educación Secundaria Obligatoria (ESO), y 1º y 2º de Bachilleratu, «de forma análoga a lo qu’asocede n’otres materies como Llingua, Matemátiques y Hestoria». Otra que vuelve va ser ‘Ética’, pa los estudiantes de 4º de secundaria.

Ente los motivos remanaos na propuesta non de llei ta la situación anómala en que s’atopaba la materia: «La LOMCE caltenía como troncal la materia de Filosofía de primeru de Bachilleratu, pero esaniciaba’l calter troncal de la Hestoria de la Filosofía de segundu de Bachilleratu y el calter obligatoriu de la Ética de cuartu de la ESO. Esti cambéu significaba, poro, el mayor retayu d’esta materia na hestoria de la educación non universitaria d’España».

L’estudiu d’estes materies «ayuden al desenvolvimientu intelectual del alumnu nel exerciciu del pensamientu astractu y nel desenvolvimientu de la función executiva del celebru», sigue’l documentu presentáu’l 18 de xunetu. «La so enseñanza dexa al adolescente desenvolver ciertu distanciamientu críticu cola realidá que lu arrodia pa tomar una decisión argumentada».