Portada Escéniques La Filarmónica acueye esti sábadu una gala benéfica de visibilización de les enfermedaes rares

La Filarmónica acueye esti sábadu una gala benéfica de visibilización de les enfermedaes rares

by redacción asturnews

El Teatru Filarmónica va acoyer esti sábadu un eventu, entamáu por ChySPA, con forma de gala benéfica pala sensibilización de les enfermedaes rares. La gala va entamar a les 19 hores, con entrada llibre, y ta organizada pola Asociación Chiari y Siringomielia del Principáu d’Asturies (ChySPA), desenvolviéndose por cuenta de la celebración el próximu martes 28 del Día Mundial de les Enfermedaes Rares.

L’oxetivu de la gala ye sensibilizar a la población sobre la problemática de les enfermedaes rares y dar a conocer a quien les sufren, dando la palabra a enfermos y families. Coles mesmes, destacó la importancia d’invertir n’investigación y de trabayar en red administración, profesionales sanitarios y enfermos.

Nel intre de la gala, van llevar a cabu delles representaciones artístiques como la performance ‘La investigación, la nuesa esperanza’, al cargu de neños de l’asociación o una actuación d’alumnos de preseos de cuerda del Conservatorio Cimeru de Música “Eduardo Martínez Torner”.

A lo último, el Grupu de teatru Terapéuticu ChySPA, formáu por persones afectaes por Chiari y Siringomielia, va representar una obra teatral escrita y empobinada pol doctor José Manuel Fernández Vega, médicu d’atención primaria: “La importancia de nun llamase Mimí”. La obra reflexa l’alteración que sufre Elba, una neña soñadora y feliz, y la so familia cuando-y ye diagnosticáu’l Chiari y como la so tía Paulina ayúdalu a enfrentar con gran fortaleza la enfermedá.

Tamién te podria gustar