Portada Conceyos La Fiesta del Cielu sumase al branu xixonés ente’l 14 y el 25 de xunetu

La Fiesta del Cielu sumase al branu xixonés ente’l 14 y el 25 de xunetu

by asturnet

L’Alcaldesa de Xixón, Ana González, y la xerente de Divertia, Lara Martínez, presentaron a primeros de mes la Fiesta del Cielu, una nueva programación que vien arriquecer l’actividá del branu xixonés con un estensu programa ellaboráu por Divertia que se va desenvolverse ente los díes 14 y 25 de xunetu.

La nueva propuesta vien presentada como ampliación, refuerzu y reformulación del clásicu Festival Aeronáuticu Internacional que va llegar a la so XV edición el 24 de xunetu, y como un nuevu elementu de promoción turística de la ciudá.

La Fiesta del Cielu axunta un programa d’actividaes lúdiques, deportives, didáctiques y divulgatives empobinaes a tolos públicos al traviés d’exhibiciones, talleres, cursos, esposiciones y actividaes d’aire llibre en redol a la cultura aeronáutica, el deporte, l’astronomía o la ornitoloxía. Ente les actividaes programaes destaca pola so novedá’l primer espectáculu nocherniegu de drones que s’entama nel Norte d’España, nel que más de 100 aparatos van volar al son de la música na nueche del 16 de xunetu.

La programación de la Fiesta del Cielu desenvolvióse en collaboración cola Universidá d’Uviéu, la Federación de Deportes Aéreos, l’asociación Omega, l’Asociación Ornitolóxica “El Tragamón”, el Círculu Aeronáuticu Jesús Fernández Duru o la NASA.

Tamién te podria gustar