La feria FETEN de Xixón algama’l Premiu Max a la Contribución a les Artes Escéniques 2016

El comité organizador de los Premios Max de les Artes Escéniques dio a conocer el miércoles pasáu, 6 d’abril, el Premiu Max a la Contribución a les Artes Escéniques 2016. Nesta ocasión, la reconocencia foi otorgáu por unanimidá a la Feria Europea de les Artes Escéniques pa Neños y Neñes (FETEN), de Xixón, qu’anguaño celebró’l so ventiavu quinta edición, por respetar, sofitar y dignificar los espectáculos pa la infancia y pol so ponderatible llabor de creación de nuevos públicos.

El comité concede la distinción al certame “por consolidase como referente internacional d’artes escéniques empobinaes al públicu familiar y por respetar, sofitar, alzar y dignificar los espectáculos pa la infancia. Porque ta demostráu qu’averase al fechu escénicu n’edaes tempranes ayuda a amar y, nesi sentíu, FETEN lleva a cabu un ponderatible llabor de creación de públicos”. Los Premios Max de les Artes Escéniques son los más relevantes  a nivel nacional. Nacieron en 1998 de la mano de la Sociedá Xeneral d’Autores yEditores. Anguaño 2016 concedieron el premiu a FETEN, qu’optaba al galardón xuntu con  otros 22 candidatos.

Esti premiu ye la reconocencia a un llabor de 25 años de trabayu en favor de les artes escéniques que se vien faciendo dende Xixón y dende los servicios de la Fundación Municipal de Cultura, Educación y Universidá Popular. Marián Osácar, directora de FETEN, va recibir el galardón na ceremonia de los XIX Premios Max, que va tener llugar el próximu 25 d’abril nel Teatru Circu Price de Madrid. Osácar señaló que “pa la Fundación Municipal de Cultura, Educación y Universidá Popular del Conceyu de Xixón y pa tol equipu d’organización de FETEN, esti premiu ye una manera de dicinos que’l trabayu va per bon camín, que ta bien fechu. Fai sentir partes del oficiu y, como tales, tenemos de dicir que faemos FETEN ente toos: les compañíes que nos visiten, el programadores que vienen veles y, qué tanto, tolos neños y neñes de Xixón, que son el espectadores primeros de los espectáculos y los verdaderos protagonistes”.

“FETEN nació en Xixón va venticinco años y siempres caltuvo’l so aspeutu de feria”, afirma Marián Osácar, que considera fundamental el calter profesional de la iniciativa, más allá de la simple exhibición.  Ente los próximos retos de FETEN, Marián Osácar destaca la internacionalización. Nesti sentíu y, anque resalta la presencia de “un diez a un trelce per cientu” de compañíes de fora d’España, considera interesante pa la feria xixonesa la espansión esterior. “El mercáu nacional ta establecíu; yá hai compra y vienta. Pero lo que pretendemos ye salir, y que vengan munchos programadores internacionales p’abrir fronteres a toes nueses compañíes”, conclúi la directora de la feria.

Amás de les 22 candidatures a concursu a los Premios Max de les Artes Escéniques, el comité organizador concede 3 premios especiales: Honor, Contribución a les Artes Escéniques y Aficionáu. Entamaos pola Fundación SGAE dende 1998, los Premios Max, que’l so galardón ta diseñáu pol poeta y artista plásticu Joan Brossa (Barcelona-1919/1999), impulsor d’unu de los colectivos renovadores del arte español de posguerra, consolidáronse a lo llargo d’estos años como la reconocencia más amplia nel ámbitu de les Artes Escéniques nel Estáu español.