Portada Lliteratura La Feria del Llibru de Frankfurt entamó en formatu dixital

La Feria del Llibru de Frankfurt entamó en formatu dixital

by redacción asturnews

La Feria del Llibru de Frankfurt, la mayor del mundu na industria editorial, abrió les sos puertes anque ensin ensames, con pabellones vacíos y formatu dixital. Dende esti miércoles hasta’l domingu, unos 750 oradores (ente autores, profesionales de la edición y espertos) van aldericar por videoconferencia (en total, 260 hores), mientres casi 4.400 editoriales, axencies lliteraries y provisores de servicios del sector de 103 países van tener espositores dixitales en cuenta de allugase en stands de los pabellones.

Na ceremonia inaugural, celebrada nel escenariu de la cadena pública ARD nel Festhalle (palaciu de festivales) de Frankfurt, l’orador invitáu foi l’escritor israelín David Grossman, que faló por videoconferencia dende Jerusalén. “¿Qué podemos faer los escritores énte la pandemia? Tenemos el poder de la observación; va haber cambeos económicos, sociales, políticos, va haber sistemes que se van colapsar, o van tomar otres formes; en munchos países la clase media va emprobecese, y los probes volveránse indixentes”, razonó Grossman, bien seriu, énte un limitadísimo públicu d’autoridaes y representantes del sector editorial.

David Grossman sollertó de que, col coronavirus, “como asocede siempres que los fundamentos de la sociedá son sacudíos, cuando la seguridá personal y nacional escayen, llega’l riesgu del nacionalismu, el fundamentalismu relixosu, la xenofobia y el racismu, el dañu severu a la democracia y a los derechos civiles. Y el escritores tenemos de reparar, y tenemos d’escribir, y documentar, y llanzar avisos”.

Ente autores de sonadía que van falar nesta inusual feria de manera virtual figuren: Margaret Atwood, Bernardine Evaristo, Edward Snowden, Joshua Wong, Chilly Gonzales y Malakoff Kowalski, Leïla Slimani, Francesca Melandri, y Bruno Latour, ente otros. Los 60 actos principales van celebrase –siempres ensin públicu– nel citáu escenariu de la ARD.

Les videoconferencies culturales consuelen nel sentíu de que la pandemia obligó a la feria a un esfuerzu de dixitalización que va dexar participar a persones que por motivos económicos nun allegaben. “Per primer vegada la feria ye accesible a xente que nun puede venir físicamente”, afirmó. Sicasí, aportunó, l’oxetivu ye tener un certame físicu nel 2021, porque “el caos, los alcuentros casuales dientro de la cortil, fomenten la creatividá, crean oportunidaes, y eso nun se consigue per vía dixital; lo dixital ye un complementu”.

Más información

Tamién te podria gustar