La fadista Mariza, Premiu Lusu Español d’Arte y Cultura 2018

La fadista Mariza foi galardonada esti llunes col Premiu biañal Lusu Español d’Arte y Cultura 2018, dotáu con 75.000 euros, según el fallu del xuráu, que destacó’l so trabayu en favor de les relaciones de los dos países.

El premiu, que concede’l Ministeriu de Cultura y Deporte y que en 2016 recayó na Fundación José Saramago, reconoz la obra d’un creador nel ámbitu del arte y la cultura qu’amonte la comunicación y cooperación cultural ente España y Portugal. El xuráu d’esti premiu consideró que’l trabayu de Mariza a favor del fomentu de les relaciones hispanu-portugueses “queda patente na so participación na película ‘Fados’ del director español Carlos Saura y nos numberosos conciertos que dende l’añu 2008 realiza por diversu escenarios d’España”.

Tamién sorrayó’l llabor de Mariza “nos dúos interpretaos al pie de reconocíos solistes d’España como Miguel Poveda, Pedrete Paris, Concha Buika o Segio Dalma y que suponen, ensin dulda, xuna acertada fusión de ritmos diversos que contribúin a baltar fronteres y averar públicos”. El Premiu Lusu-Español d’Arte y Cultura foi creáu en 2006 con calter biañal pa premiar la obra d’un creador nel ámbitu del arte y la cultura en cualesquier de les sos manifestaciones y amontar la comunicación y cooperación cultural ente España y Portugal.

Marisa dos Reis Nunes, Mariza, (Maputo, Mozambique, 1973), ye una cantante de fado de les más populares de Portugal y una de les artistes luses con mayor proyección internacional. Empezó a ser reconocida en 1999 arriendes de la muerte de la fadista Amália Rodrigues, en que los sos homenaxes póstumos participó. Publicó’l so primer álbum en 2001, “Fado em mim”, al que siguió “Fado curvu”, en 2003, que l’asitió como artista y que-y dio l’ésitu internacional.