La Facultá de Turismu d’Uviéu ta empuesta al zarru si nun pon en marcha Gastronomía

La Facultá de Turismu d’Uviéu ta empuesta al zarru si nun pon en marcha Gastronomía
27 setiembre 08:56 2019 Imprimir

La Facultá de Turismu d’Uviéu ta empuesta al zarru si nun pon en marcha Gastronomía, mentantu la Universidá alvierte de qu’agora escarez de fondos anque defende esti grau y el Principáu caltien el so refugu.

Cuando la facultá de Olloniego zarre’l presente curso en xunu, non solo va tar diciendo adiós a la so última promoción de graduaos en Turismu, sinón que va tar despidiendo a los estudiantes que-y queden. Los responsables d’esti centru adscritu a la Universidá d’Uviéu alcordaron va trés años dexar d’abrir matrícules pa centrase nun nuevu y ambiciosu proyectu docente, que tenía por bandera un grau de Gastronomía. La so aprobación llegó’l pasáu xunu, demasiáu tarde, según la decana, pa llograr el mínimu de matriculaciones necesariu pa estrenalo’l presente cursu. Y si nun llogra sacar alantre esti grau nun añu, nun va haber próximu cursu. La Facultá de Turismu d’Uviéu ta empuesta al zarru ensin esta titulación.

Por eso, l’equipu empobináu por Marián G. Rúa trabaya «ensin tirar la toalla» para llograr enllantar estos estudios el cursu que vien, para que la so consecución ve básicu llograr que sía un títulu oficial. De nun sacar el grau adelantre, «nun voi tener ánimu de siguir», alvierte la decana. Caltien un filo d’esperanza: «A un añu vista, pueden faese munches coses».

La decana reconoz que sería «insensata y malísima xestora» si nun-y esmoleciera’l futuru de la facultá, pero confía en «tener les blimes necesaries para construyir un bon cestu». Asegura poner la mano nel fueu porque los alumnos que tán cursando Turismu nel centru van acabar la so titulación en Olloniego y adelantra tar trabayando cola Universidá Iberoamericana de México nun cursu piloto de formación en sala del que s’encarguen del conteníu.

L’equipu va disponer de tiempu para promocionar el títulu dientro y fora del Principáu y pa «maurecer» tolo rellacionao cola concesión de beques a los alumnos, que van amenorgar hasta en 3.500 euros cada cursu de los cuatro de que consta’l grau. El preciu ye unu de los asuntos sobre los que van cavilgar los responsables, anque la decana defende que falen d’unos estudios de por sí caros. La otra cuestión a trabayar tien que ver cola reconocencia del títulu como oficial de la Universidá, en llugar de tratase d’unu propiu. El rector, Santiago García Granda, cree que nun ye posible nes actuales circunstancies. Siquier, non en solitariu. «Sacantes el Principáu tenga dalgún plan para llanzar el grau, nós nun tenemos recursos para ponelo en marcha agora mesmu», aseguró ayeri en Mieres.

Pero nel Principáu nun tán pol llabor. Fuentes de la Conseyería de Ciencia, Innovación y Universidá, alvirtieron de que nun se dio nenguna circunstancia nueva que faiga camudar la decisión adoptada’l pasáu añu. Esto ye, que’l Gobiernu rexonal nun lu sofita.

  Categories: