Portada Educación La evaluación del alumnáu va ser «colexada y flexible» n’Asturies

La evaluación del alumnáu va ser «colexada y flexible» n’Asturies

by redacción asturnews

Al igual qu’asocedió na evaluación final del cursu pasáu, tamién esta vegada la Conseyería d’Educación encamentó a los centros a tener en cuenta la situación escepcional de la pandemia  a la d’evaluar a los alumnos d’ESO y Bachilleratu. Nuna xunta celebrada esta selmana con equipos directivos d’institutos de Secundaria y de FP, la conseyería treslladó so propuesta sobre los criterios d’evaluación, promoción y titulación pa esti cursu.

 

Avérense les sesiones d’evaluación del primer trimestre y Educación quixo recordar los términos que s’aprobaron nun decretu en septiembre. La situación escepcional afecta principalmente al alumnáu que ta en réxime de semipresencialidad, pero tamién a tolos grupos que tuvieron que guardar cuarentenes. La idea ye que se tomen siempres les decisiones «que resulten más favorables al alumnu».

Principalmente, encamentar a los centros a ser «flexibles» y alcordar la evaluación de forma colexada ente l’equipu docente, valorando la situación de cada alumnu nesti contestu. Fueron la directora xeneral d’Ordenación Académica, Evaluación y Equidad Educativa, Paula García, y el director xeneral d’Enseñances Profesionales, Javier Cueli, amás de miembros del Serviciu d’Inspección quien informaron de los planteamientos, que pasen por dexar qu’en ESO los alumnos puedan pasar de cursu y titular con dos asignatures suspendíes, trés de forma escepcional. La repetición va ser una midida de calter escepcional. Tocantes a la titulación, recuérdase que se tenga en cuenta «el grau de cumplimientu de los oxetivos de la etapa». Pa titular en Bachilleratu, l’alumnu tendrá de consiguir una nota media igual o superior al cinco.

Nel ámbitu de la FP, va dexase al alumnáu matriculase en módulos de segundu curso si la carga horaria de los superaos en primero ye cimeru al 50% y si l’horariu ye compatible. Tamién s’adoptaron midíes de flexibilización de la Formación en Centros de Trabayu (FCT).

Tamién te podria gustar