La Estaya de la Llingua d’Avilés programa 3 actuaciones infantiles n’asturianu

La Estaya de la Llingua d’Avilés programa 3 actuaciones infantiles n’asturianu
19 ochobre 09:46 2016 Imprimir

El Conceyu d’Avilés, en collaboración cola asociación Reciella-Families pol asturianu, programa pa los meses d’ochobre, payares y avientu tres actividaes infantiles dientro del ciclu La Reciella de la Factoría.

Ye’l tercer añu consecutivu que la Estaya de la Llingua del Conceyu d’Avilés entama estes actuaciones, que siempre cuenten con una participación bultable de la rapazada. Les tres van celebrase, como ye vezu, nel Espaciu Escénicu de la Factoría Cultural y tienen entrada de baldre hasta enllenar l’aforu.

Trátase d’una iniciativa que busca afalar l’usu del idioma propiu ente los neños y neñes de la ciudá, anque davezu cuenta con públicu d’otros Conceyos d’Asturies. Al traviés d’actuaciones escéniques onde xueguen un papel importante la palabra, la imaxinación o la música, lo más pequeño de la casa va poder disfrutar asina de tiempu d’ociu col asturianu como llingua vehicular.

Les actividaes programaes pa esti añu son les que vienen darréu:

-21 d’ochobre. “Moliniellu”, cuentacuentos con Ólga Cuervo. Cuentos que falen de moliniellos de vientu, de café y de música. Espectáculu pa ver y escuchar. 19.00 hores. Factoría Cultural

-25 de payares. “Cuentos, cháchares y paroles”, de Carlos Alba. Cuentos, canciones y una retafila histories, sobre too de tradición oral. 19.00 hores. Factoría Cultural.

-16 d’avientu. “L’Anguleru; Suaños de Navidá”, con Ólga Cuervo. L’Anguleru ye un pescador asturianu que trai regalinos a los neños y les neñes la nueche del 24 d’avientu. 19.00 hores. Factoría Cultural

Esta programación súmase a la presentada recientemente pa los centros socioculturales de Versalles, La Xungarosa, La Carriona y la biblioteca Bances Candamo, que inclúi teatru, maxa, música, cuentacuentos, esposiciones y talleres, amás de les Xuntes d’Escolines y Escolinos d’Avilés y Comarca, otra actividá entamada pola Estaya de la Llingua y que dende hai más d’una década tamién tien l’oxetivu de normalizar l’usu del nuestru idioma ente les xeneraciones más nueves.

  Categories: