La esposición sobro’l Camín na Edá Media aporta a La Puela Ayande

La esposición sobro’l Camín na Edá Media aporta a La Puela Ayande
07 avientu 12:20 2021 Imprimir

La esposición sobro’l Camín de Santiago na Edá Media llega a la Casa de Cultura de La Puela Ayande. L’amuesa itinerante ta producida pol Muséu d’Hestoria Urbana d’Avilés y yá pudo ser vista en dolce localidaes asturianes.

La Casa de Cultura de La Puela Ayande  acueye hasta’l próximu 12 d’avientu l’amuesa “La ruta de les estrelles. El Camín de Santiago na Edá Media”, una esposición de la Área de Cultura y Promoción de Ciudá del Conceyu d’Avilés producida pol Muséu de la Hestoria Urbana d’Avilés (MHUA). Por cuenta de la celebración d’esti inusual bienio xacobéu la esposición sigue’l so itinerariu espositivu por distintos conceyos asturianos polos que trascurren los distintos caminos que van a Compostela. Nesti sentíu hai que señalar que son yá dolce los conceyos nos que tuvo espuesta.

Les etapes que trascurren pol ampliu conceyu allandés son, ensin dulda, de les más dures de tol Camín Primitivu. Dende la localidá de Borres, en Tinéu algama la capital, La Puela Ayande y en travesando’l Puertu del Palu, llega a Berducedo y baxando por La Mesa hasta’l calce del rio Navia, enfusar en Grandas de Salime, l’últimu conceyu asturianu na ruta del Camín Primitivu a Compostela. Entá si cabi de mayor durez ye la variante de “Hospitales” que va pol cordal de la sierra del mesmu nome.

Tou un conceyu que cunta con un importante patrimoniu monumental (Palaciu de Cienfuegos, ilesia de Celón, castru de San Chuis, restos d’esplotaciones mineres romanes en Bustantigu, pueblos como Santu Emiliano, construcciones  de horreos y viviendes….) y natural.

La mesma semeya del cartelu anunciador de l’amuesa, obra de Daniel Fernández García, ye un claru exemplu de la magnificencia d’esta redolada natural.

Casa de Cultura de La Puela Ayande

Vienres a martes: 17:00 a 18:00 hores.

  Categories: