La esposición «Margarita Salas: una muyer con ciencia» abrese nel Antiguu Institutu

La esposición «Margarita Salas: una muyer con ciencia» abrese nel Antiguu Institutu
17 avientu 12:19 2020 Imprimir

Esta selmana presentóse na sala 3 del CCAI la esposición «Margarita Salas: una muyer con ciencia». Esta esposición, pensada pa públicu n’edá escolar, quier sacar a la lluz el papel de les muyeres na investigación científica, centrándose sobre manera na interesante trayeutoria de l’asturiana Margarita Salas, analizando los sos descubrimientos y percorriendo toles sos etapes vitales. 
La esposición ye, en resumen, un  averamientu didauticu a la figura de Margarita Salas n’asturianu y ente los sos oxetivos ta’l poner en valir el papel de les muyeres na ciencia, ayudando a que se conozan los sos llogros y investigaciones y tentando de romper cola tradicional brecha de xéneru presente nesta estaya (y en tantes otres).

Una de les figures más relevantes de la ciencia na segunda metá del sieglu XX foi la bioquímica asturiana Margarita Salas. Ente la bayura de les sos contribuciones rescampla’l descubrimientu de cómo funciona la complexa maquinaria al rodiu del ADN. L’estudiu del perfil xenéticu aplícase en munchos campos (dende pruebes mediques a investigación de crímenes).

El segundu oxetivu de la muestra ye poner en valir l’asturianu: toles llingües valen pa falar de too. Y nun hai unes más apropiaes qu’otres pa referise a la ciencia. Con esta esposición queremos dar un pasu más na normalización de la llingua asturiana na ciencia: yá hai tesis científiques, publicaciones de bien de disciplines científiques.

L’amuesa articúlase en nueve paneles de conteníu sobre Margarita Salas y los testos de los paneles son de la profesora de física y química y especialista n’asturianu Marta Fernández Novo. Divídense en «Biografía», «Investigación», «Reconocimientos», «Muyer y Ciencia» y «Estoyu»). Amás, hai tamién un vinilu y trece cuadros pa saber más sobre les muyeres más relevantes na historia de la ciencia y de les matemátiques.

Trátase d’una iniciativa de Casio pa divulgar la figura de les científiques y trabayar recursos STEAM (Ciencia, Teunoloxía, Inxeniería y Matemátiques) centraos nes muyeres; los materiales tán disponibles en toles llingües del Estáu, la torna al asturianu fízose dende la Oficina de Normalizaciuón Llingüística.

Los neñes y neños que visiten la esposición van entrar nel sortéu de delles calculadores científiques cola imaxe de Margarita Salas, cedíes por Casio Complementen la esposición delles figures -una mesa de llaboratoriu, un microcospiu y una cadena d’ADN-, amás d’un un photocall y d’un audiovisual  que cedió el Museo de Ciencias de la Universidá de Navarra.

ESTI YE L’ENLLAZ A LOS CONTENÍOS DE LA ESPOSICIÓN

  Categories: