La esposición ‘Fantasía Ilustrada’ d’Irene Caleya abre al públicu esti martes

Güei martes, 21 de xunu, va tener llugar na Casa Municipal de Cultura a les 19 hores l’apertura de la esposición ‘Fantasía ilustrada’ d’Irene Caleya. Esta esposición podrá visitase hasta’l próximu vienres 16 de xunetu nos horarios habituales de sala d’esposiciones: Mañanes, de llunes a sábados: de 11.00 a 13.00. Tardes, de llunes a vienres, de 18.00 a 21.00. Domingos y festivos de 11:00 a 14:00 hores.

L’artista esplega’l so imaxinariu como una forma de conexón perversa cola infancia. Los personaxes qu’apaecen nos sos dibuxos, sicasí, escuerren a l’artista desque yera pequena, siendo influencia directa de los llibros, películes, animaciones y videoxuegos colos que creció. Les sos ilustraciones, a mediu camín ente la tradición mitolóxica de corte naturalista, la ciencia-ficción post-humanista y la reivindicación d’un universu xuvenil, anque fuertemente sexual, pueden ser vistes como un exerciciu de fuximientu y re-definición de les llendes ente la ilusión y lo real. La necesidá de l’autora de vivir fora de les continxencies de lo cotidiano, siempres con un pie nun mundu paralelu.

Otra manera, los sos personaxes femeninos tescienden el rol que la sociedá suel atribuyir a la muyer, inclusive cuando ésta interpreta’l papel d’heroína. Llueñe pos de la iconografía de damisela n’apuros, ensin necesidá d’esperar a nengún príncipe azul, Irene Caleya traza cuerpos atayantes, musculosos y arguyosos de la so sexualidá. Formes a caballu ente lo femenino y lo monstruoso, tamién, neñes d’aspeutu naif pero espíritu cerbunu.

Muyeres, toes elles d’anatomía fuerte, trazos duros y atributos afilaos, pero duces, que ponen n’entredichu les llendes del xéneru, entendíu esti conceutu tantu na so acepción rellacionada colo canónico en cómics y llibros d’aventures, como na so taxonomía rellacionada coles condiciones culturales y polítiques que dixebren biológicamente los cuerpos masculinos y femeninos. Nesta esposición, xuntu colos personaxes fantásticos qu’habiten nun mundu paralelu que tristemente nun puede ser el nuesu, xuntu cola llucha ente les escenografíes escures y el so colores pastel, cavílgase sobre’l procesu que lleva del lápiz y del bocetu al arte final, pasando necesariamente pola omnipresencia de técniques contemporanees como el color dixital.

La resultancia ye un tipu de técnica híbrida, y non solo poles sos heterogéneas fontes, qu’inclusive podíen traslucir un ciertu influxu del arte urbano; sinón, y sobretou, pola combinación del lápiz col entintado dixital, onde puede reparase cómo lo dixital nunca llega a sustituyir a lo analóxico. Pa Irene Caleya trabayar n’unu o otru formatu nun marca nenguna diferencia, solo trátase d’aprovechar les ventayes de cada mediu esplotando inclusive les desventaxes y los erros, nun procesu d’aprendizaxe ensin fin. La esposición axunta ilustraciones, carpetes de bocetos, bolsos y camisetes.

Irene Caleya (1982), al traviés del dibuxu, imaxina mundos, personaxes y hestories. Llicenciada en Filosofía pola Universidá d’Uviéu, l’artista mora anguaño en Madrid, onde s’hai diplomáu en “Ilustración, publicidá y diseñu con cómic” y “Ilustración dixital y concept art”, na Escuela Cimera de Dibuxu Profesional (ESDIP). Como ilustradora profesional freelance, lleva años realizando trabayos per encargu tantu a nivel particular como empresarial. Carrera que compaxina colos sos propios proyectos.
Pel branu de 2015 publicó Les Catacumbes de Salem, un proyectu de cómic nel que participó dibuxando y dando color al relatu. La Descendiente foi publicáu por The Rocketman Project. N’ochobre y noviembre de 2015 realizó dos exposición en Blimea y Sotrondio (Samartín del Rei Aurelio-Asturies-) amosando principalmente’l so trabayu con técniques dixitales.