La esposición “El señor de la mar” recuerda a Pedro Menéndez d’Avilés

La esposición “El señor de la mar” recuerda la figura poliédrica de Pedro Menéndez d’Avilés y reflexa les sos habilidaes como marín, estratega, científicu, inxenieru naval o coordinador d’acciones tan complexes como’l desplazamientu de cientos de barcos de la Flota d’Indies.

Pedro Menéndez d’Avilés foi muncho más que l’Adelantráu de La Florida: un personaxe crucial na hestoria d’España nel sieglu XVI. El trabayu de documentación sobro la figura del marín avilesín que fixeron los comisarios Ramón Vega y Hugo Vázquez remató na esposición “El señor de la mar”. Entamada pol Conceyu d’Avilés, podrá vese na Casa de Cultura hasta’l 15 de setiembre.

Esta amuesa, encargada pol Conceyu nel marcu del programa d’actos conmemorativos del quintu centenariu de la nacencia de Pedro Menéndez, va dexar al públicu aportar a la so figura dende’l rigor historiográficu d’una investigación científica. Cuenta cola collaboración d’instituciones del prestíu de la Universidá de Stanford, la Universidá d’Uviéu, el Muséu Naval de Madrid, la Fundación Alvargonzález, Glencore, l’Autoridá Portuaria d’Avilés o la Institución Fernando’l Católicu.

El públicu va tener énte sí material inéditu y fontes orixinales en forma de maquetes, cartes, mapes, llenzos y material audiovisual que van dexar aportar al Adelantráu de La Florida dende’l rigor d’un tratamientu actual y científicu.

Gracies al planteamientu de la esposición, va apaecer énte los visitantes un Pedro Menéndez poliédricu, muncho más qu’un simple marín que se convirtió n’Adelantráu de La Florida y fundó la primer ciudá de los actuales Estaos Xuníos. Un personaxe del so tiempu que destacaba en múltiples facetes, marín, estratega, científicu, inxenieru naval o coordinador d’acciones tan complexes como’l desplazamientos de cientos de barcos, organizador de la Flota d’Indies, el gordón umbilical ente España y América.

El trabayu de documentación dexó aportar a material inédito y a fontes orixinales procedentes d’una decena de países, d’archivos públicos y privaos, como pliegos, cartes de los protagonistes, llenzos de dómina, inventarios, diarios… Y remata nun estudiu heterogéneo qu’inclúi dende datos botánicos a antropolóxicos, artísticos, d’arquitectura o de construcción naval.

L’amuesa pon en contestu distintos momentos de la so vida, cola sociedá del momentu, y presenten al públicu ampliu y diversu material, dende reproducciones de los barcos más emplegaos por Pedro Menéndez, como’l San Pelayo o los galeones agalerados” diseñaos por él. Pero tamién paneles esplicativos, reproducciones, mapes de la dómina, cartes, documentos, o material audiovisual como’l la reconstrucción en 3D del primer mapa completu del asentamientu que funda, San Agustín de la Florida.

Les sos fazañes antes de reconquistar de La Florida, dende cazador de pirates, a marín d’enfotu pal príncipe Felipe, futuru monarca como Felipe II. “El señor del Atlánticu”, el principal marín de la corona española nel océanu, pero tamién inxenieru naval ya inventor. El so papel d’Adelantráu a Gobernador, y la buelga que dexó en La Florida. Espaciu de memoria, que recueye cómo foi tratada la so figura nel tiempu y les distintes iniciatives que reivindicaron la so trescendencia na hestoria d’España.