La esposición “Discografía Fotografiada” completa’l conciertu d’arranque de xira de Lluz Casal n’Avilés

by redacción asturnews | marzo 15, 2018 11:09 am

La esposición “Discografía Fotografiada” completa’l conciertu d’arranque de xira de Lluz Casal n’Avilés y va esibise na Cai Palacio Valdés, en 4 paneles d’aceru. L’artista actúa nel Teatru Palacio Valdés el vienres día 16, con entraes escoses dende va delles selmanes.

La conceyalía de Cultura quixo completar el conciertu d’arranque de xira de Lluz Casal del próximu vienres 16 (20:30 hores) nel Teatru Palacio Valdés con un homenaxe a l’artista en forma d’esposición de la so discografía. Les entraes pal conciertu escosaron a los pocos díes de ponese a la vienta.

Cásique 35 años dempués del so debú, Lluz Casal va presentar el so nuevu álbum, compuestu na so integridá por nuevu cantares y producíu por Ricky Falkner, quien tuvo al frente del soníu de trabayos recién d’artistes como Love of Lesbian o Quique González, ente otros.

L’amuesa lleva por títulu “Discografía Fotografiada” y consta  de 4 paneles d’aceru corten que se van asitiar na redoma del Teatru Palacio Valdés, na cai del mesmu nome en plenu cascu históricu avilesín. Estos paneles van sirvir de soporte pa reproducir les portaes de los sos trabayos discográficos editaos n’España dende 1980. Va Poder ser contemplada dende’l llunes día 12 y hasta el domingu 18.

La conceyala de Cultura, Yolanda Alonso, esplicó que “ye’l nuesu pequenu homenaxe a una artista internacional con fonda vinculación con Avilés, una manera de reconocer la trayectoria de Lluz y d’estima-y que nos escoyera como arranque de la so nueva xira, daqué que nos causa xuna gran allegría”. Alonso añedió que “vamos poder esfrutar de les portaes de los discos que marcaron la obra d’una de les cantantes más representatives de la música n’español”.

“Discografía Fotografiada”  entama en 1980 cola portada de “L’ascensor”, el so primer trabayu, y llega hasta 2018, añu en qu’acaba de ver la lluz “Que cuerra l’aire”. Ente dambos, un total de 20 grabaciones oficiales con cantares que fueron númberu 1 n’España y en munchos países del mundu, discos que superaron el mediu millón de copies vendíes y decenes de xires por más de trés continentes. Nun s’inclúin nesta esposición les portaes de les sos singles editaes, nin les ediciones de los sos discos n’otros países, nin les sos numberoses collaboraciones con otros artistes

“Discografía fotografiada” ye xuna producción del Conceyu d’Avilés, con diseñu d’Andrea Parissi y coordinación de Béznar Arias.

Source URL: http://asturnews.com/la-esposicion-discografia-fotografiada-completal-conciertu-darranque-de-xira-de-lluz-casal-naviles/