La esposición del Premiu Fotografía Humanitaria “Luis Valtueña” torna a Avilés

La esposición del Premiu Fotografía Humanitaria “Luis Valtueña” torna a Avilés
08 ochobre 08:42 2020 Imprimir

Inaugurada na Factoría Cultural esti miércoles 7 d’ochobre y n’exhibición hasta’l 3 de payares, la esposición del Premiu Internacional de Fotografía Humanitaria “Luis Valtueña” torna a Avilés y amuesa’l trabayu del ganador de la XXII edición, l’arxentín Juan Medina, cola so serie “Vida y muerte nel Mediterráneu”, y los finalistes, los españoles César Dezfuli, Carmen Sayago ya Ignacio Martín. Un total de 40 fotografíes que reflexen el drama de les migraciones, la probeza y l’aislamientu social.

Un añu más, y yá son trés consecutivos, la esposición del Premiu Internacional de Fotografía Humanitaria “Luis Valtueña” torna a Avilés, de la mano de la Factoría Cultural. L’amuesa, una compilación de 40 instantánees que ponen el focu nes desigualdaes sociales y conviden a la reflexón sobro’l mundu actual, inaugúrase’l próximu miércoles, 7 d’ochobre, y va permanecer n’exhibición hasta’l 3 de payares.

Correspondese cola XXII edición d’esti galardón, unu de los más prestixosos d’España, con rangu internacional, y falláu nel 2018. Recueye’l trabayu del ganador, Juan Medina, cola so serie “Vida y muerte nel Mediterráneu”; del primera finalista, César Dezfuli, con “Banjul to Biella”, y de los finalistes ex aequo, Carmen Sayago con “Birds of pollution”, ya Ignacio Martín con “Crímenes de fame”.

El fotógrafu arxentín Juan Medina punxo’l focu nel Mediterráneu, llugar de camín y muerte de los migrantes que fuxen d’África. Les sos fotografíes fueron realizaes mientres un operativu de rescate de la ONG española Proactiva Open Arms, a embarcaciones que salíen de l’afarada Llibia. “El mio trabayu -argumenta’l fotógrafu- ye parte de la documentación qu’hai nestos más de 30 años de traxedia, ye xuna aportación más qu’amuesa qu’arriesgar la vida como única forma de migrar ye un drama estructural dende va demasiao tiempu”.

En “Banjul to Biella”, l’español César Dezfuli documenta mientres meses la vida del mozu gambianu Malick, dende’l so rescate nel Mediterráneu hasta la so llegada a una ciudá del norte d’Italia.

La esposición avera coles mesmes otres realidaes, como la claustrofóbica rutina de les muyeres afectaes pol síndrome de sensibilidá química múlitple, sacaes a la lluz pola española Carmen Sayago na so serie “Birds of pollution”, y la de los Crímenes de la fame”, la semeya de la delincuencia surdida de la probeza que tomó en Venezuela’l tamién español Ignacio Marín.

Podrá visitase de forma llibre y gratuita nel centru cultural de l’avenida de Portugal, 13, de llunes a vienres de 9.00 a 14.00 y de 17.00 a 20.00 hores, del 7 d’ochobre al 3 de novimebre.

Ente les midíes de protección sanitaria frente a la pandemia del COVID-19 tomaes pa poder esfrutar con seguridá de la esposición atopen l’usu obligatoriu de mázcaru, la distancia de seguridá de 2 metros, tomar de temperatura a la entrada, la desinfección con xel hidroalcohólico y el siguimientu de la señalización dientro del centru.

El Premiu Internacional de Fotografía Humanitaria Luis Valtueña convócase añalmente pola asociación Médicos del Mundu España, n’alcordanza de cuatro cooperantes asesinaos en Bosnia (1995) y Ruanda (1997) cuando trabayaben en proyectos d’acción humanitaria: Mercedes Navarro, Flors Sirera, Manuel Madrazo y Luis Valtueña. Esti postreru, fotógrafu d’oficiu, motivu pol cuál da nome al galardón.

A la XXII edición, fallada en 2018, presentáronse 386 participantes, de 72 países, los más numberosos fueron España (71), Irán (43), Brasil (21), Rusia (19), India (15), Afganistán (14), Arxentina (14), Italia (12) y Siria (12). En total, con 2.650 imaxes presentaes.

  Categories: