La escuela pública propón una fuelga xeneral pal 9 de marzu

La Plataforma Estatal pola Escuela Pública propunxo la convocatoria de fuelga xeneral unitaria de tola educación el 9 de marzu próximu pa esixir la derogación de la Lomce, la reversión de los retayos, la medría presupuestaria y un sistema de beques que garantice la igualdá d’oportunidaes.

“El pactu educativu que diz querer algamar el Gobiernu nun ye posible porque dichu mensaxe demuéstrase falsu de nuevu”, aseguren organizaciones sindicales, de padres y alumnos nun comunicáu.

La forma de proceder del Gobiernu “nun puede quedar ensin respuesta”, afirmen al referise a la decisión del Conseyu de Ministros de recurrir al Tribunal Constitucional pa intentar torgar que’l Congresu tramite una iniciativa lexislativa empuesta a paralizar la Lomce.

La plataforma interpreta que’l Gobiernu considera al Poder Lexislativu como “supeditáu” al Executivu. Amás, la Subcomisión parlamentaria que va axustar el pactu educativu entá nun arrincó y “yá nun va trabayar pa configurar una nueva llei, sinón un documentu sobre la estratexa Europa 2020”, según diz la plataforma.

Por tou ello, “la llucha tien de siguir realizándose en tolos niveles”, dende Educación Infantil hasta Universidá, y por tolos integrantes de la comunidá educativa: alumnáu, padres y madres, profesoráu y otru personal de los centros educativos.

Tamién se demanda la eliminación de les contrarreformes universitaries y de les práctiques non remuneraes en FP, recuperación de les plantiyes, dignificación de les condiciones llaborales, frenu de la privatización del sistema educativo y baxao de ratios. Asina, la plataforma propón parar tola educación la fecha citada y encamienta a les a toles organizaciones autonómiques y locales a configurar un llistáu de reivindicaciones concretes.

La plataforma ta integrada polos sindicatos CC OO, STES, UXT y CGT; los alumnos de Sindicatu d’Estudiantes, Frente d’Estudiantes, Estudiantes en Movimientu y Faest; los padres de Ceapa y el Movimientu de Renovación Pedagóxica.