La Escuela del Deporte incorpora a doscientos alumnos a distancia

La Escuela del Deporte incorpora a doscientos alumnos a distancia
26 ochobre 09:13 2018 Imprimir

El Centru Integráu de Formación Profesional del Deporte incorpora a doscientos alumnos a distancia y empecipia los sos últimos meses nes instalaciones del Institutu de La Madalena n’Avilés  yá que, si cumple’l compromisu de la Conseyería de Cultura y Educación, el próximu cursu va empezar yá la so actividá nel Colexu Virxe de les Marees.

El centru incorporó anguaño a la so ufierta formativa la educación a distancia, nesti casu pal alumnáu que-y llega al traviés de les distintes federaciones deportives que roblaron col Principáu un alcuerdu para la formación de profesionales nes sos disciplines. Na escuela d’Avilés van recibir la formación común y les federaciones van encargase depués de la específica.

A partir del próximu 12 de payares van estudiar a distancia na escuela doscientos profesionales en distintes disciplines deportives. El CIFP ye un centru homologado pol Conseyu Cimeru de Deportes para la impartición de les clases de les conocencies comunes rellacionaos col comportamientu deportivu, los primeros auxilios, l’actividá física afecha, la lexislación deportiva o la organización deportiva, ente otres materies. Al traviés de la educación a distancia mientres trés selmanes van recibir formación futuros profesionales de les federaciones de surf, axedrez, kárate y tenis, agora yá lo tán faciendo los de patinaxe artísticu, y el próximu 22 d’abril empezar a faer futuros especialistes deportivos de la federación de tiru con arcu, la d’h.oquei y de nuevu la de surf.

Per otru llau, la Escuela del Deporte sigue impartiendo les especialidaes de cursos anteriores que van dir empezando de forma gradiada y que sumen 125 persones matriculaes, a la llende de la capacidá máxima d’esti centru. En dellos casos como na enseñanza de técnicu deportivu n’esquí alpín hai, amás, llista d’espera, yá que solo ufiértense dolce places.

Les clases nes especialidaes de fútbol nivel 1 yá empezaron, ente que les de nivel 3 van facese en payares y les del nivel 2 en xineru, tamién nesa fecha van dar empiezu les de mediu monte y esquí alpín va facer a partir del 12 de payares. En cuanto la formación profesional, les clases yá dieron empiezu siguiendo’l calendariu que marca’l Principáu pa toa la FP n’Asturies. Pela so parte, los cursos de certificación profesional yá s’empecipiaron el pasáu mes de setiembre.

Ayeri mesmu’l Boletín Oficial del Principáu d’Asturies publicaba’l nuevu currículu del ciclu cimeru de formación profesional d’enseñanza y animación sociodeportiva actualizándolu a les nueves necesidaes y demandes del sector. Mientres, peracábase’l currículu del nuevu ciclu que pretende impartir la Escuela del Deporte, el de grau mediu d’actividá física nel mediu natural, que va tener que ser publicáu tamién nel BOPA. El conseyeru d’Educación, Genaro Alonso, yá anunciara que’l cambéu d’allugamientu d’este CIFP tamién llevaría apareyáu xuna ampliación de la so ufierta formativa.

  Categories: