La Escuela de Música Tradicional La Quintana abre en Xixón la matrícula

29 setiembre 08:08 2008 Imprimir

La Escuela de Música Tradicional La Quintana abre en Xixón, a lo llargo d’esta selmana, el periodu de matrícula pal cursu 2008/09, calteniendo la so ufierta educativa depués de cumplir diez años de vida.

El periodu 08/09 supon el undécimu cursu de la Escuela de Música Tradicional La Quintana, qu’echó a andar allá pel añu 1998. Asina, vuelve un añu más a ufiertar un Sitiu donde deprender y vivir la música tradicional nel conceyu de Xixón. Pa esti cursu la escuela vuelve a ufiertar 14 asignatures ente les que tán gaita, tambor, percusión, baille, vigulín, bandurria curdión diatónicu, guitarra, asturianada, clarinete, zanfona, xiblata travesera, harpa y formación en conxuntu.

Los mayestros d’estes asignatures son persones conocíes pola so vinculación a la música tradicional y folk, munchos d’ellos pertenecientes a grupos conocíos de la escena musical asturiana, como Felpeyu, Lliberdón, La Bandina o Llangres. Ye’l casu de Diego Pangua, Daniel García, Lisardo Prieto, Horacio Huerta, Toli Morilla, Borja Baragaño, Merce Santos, Pedro Pérez, Rubén Bada, José Ángel Llaneza o David Varela.

Les clases, como nos años anteriores, van impartise na Escuela Pública Rei Pelayo, utilizando les aules de la escuela pa desarrollar l’actividá peles tardes. La matrícula ta abierta tol añu al ser una enseñanza individual y adaptada al nivel de conocimientos de cada alumnu, ensin qu’haya llimitación d’edá p’apuntase, y pue cumplimentase nos sos locales de la Escuela Pública Rey Pelayo na avd. Constitución nº 57 de Xixón, o navegando pela so páxina web.

  Categories:
Loading Facebook Comments ...