Portada Lliteratura La esclusión del asturianu de los Premios de la Crítica xenera una fola de crítiques

La esclusión del asturianu de los Premios de la Crítica xenera una fola de crítiques

by asturnet

Los Premios de la Crítica d’Asturies, qu’entama cada añu dende hai más d’una década l’Asociación d’Escritores d’Asturies, nun contemplen na edición d’anguaño les obres n’asturianu. La decisión d’esta orgnización xustificada en Les Noticies “pol presupuestu axustáu” col cunten esti añu, nun pueden entedese cuando los premios nun tienen dotación económica. Por ello la Xunta pola Defensa de la Llingua Asturiana ya Iniciativa pol Asturianu protestaron énte esta organización y el Gobiernu d’Asturies, que patrocina estos gallardones. Amás, un grupu d’escritores prepara un manifiestu contra la decisión y l’escritor Carlos Suari renunció al premiu que recibiera pola so obra n’asturianu nestos gallardones como protesta pola desapaición del asturianu d’ente les categoríes.

Pa la Xunta ye necesario que “la entidá convocante qu’igüe les bases pa dar cabida a propuestes d’obres publicaes nel nuestru idioma a lo llargo del 2011”, yá que camienten que lo contrario sedría una “marxinación de los escritores n’asturianu, qu’a lo llargo d’estes décades de recuperación llingüística convirtiéronse nun pegollu fundamental del procesu de normalización”. Pa l’asociación la despaición del asturianu de los premios “supón otru grave ataque más hacia la llingua asturiana y les persones que llibremente deciden facer usu d’esti idioma”, recordando que nel 2011 publicáronse más de cien obres que teníen la llingua propia d’Asturies como vehículu d’espresión.

Iniciativa pol Asturianu, pela so parte, considera que la decisión de l’Asociación d’Escritores d’Asturies de nun contemplar les obres en llingua asturiana pa la edición de los Premios de la Crítica 2012 “ye una falta seria al idioma d’Asturies”. La organización púnxose en contautu col presidente de l’asociación convocante, Mariano Arias Páramo, pa face-y llegar la so opinión sobre esta decisión, amás de cola Conseyería de Cultura, que sovenciona estos premios, pa pidi-yos “que soliciten a la organización la vuelta a la normalidá de la lliteratura n’asturianu nestos premios, que nun tienen dotación económica”, recuerden.

“

Dende Iniciativa pol Asturianu consideren “inalmisible” tala decisión por ser “un xestu dañible pa la llingua nuna situación tan drástica como na qu’anguaño s’atopa”. Poro, piden a l’Asociación d’Escritores d’Asturies que rectifiquen esta decisión, calteniendo toles categoríes contemplaes nel pasáu, en pie d’igualdá colos escritores en castellán.

Per otru llau, Iniciativa pol Asturianu quier reconocer que, “hasta la cabera edición de 2011, esta asociación taba diendo pel bon camín al incluyir, dende la so cuarta convocatoria (2003) a la lliteratura asturiana dientro de los Premios de la Crítica, al mesmu tiempu qu’ufríen y siguen ufriendo los servicios del so web n’asturianu”, y ye por esta razón qu’esperen “qu’esta murnia decisión nun seya sinón un casu aislláu que pueda contar cola más rápida rectificación”, ufriendo la so collaboración pa qu’asina seya.

Tamién te podria gustar