La escena musical preve una debacle insólita

L’impactu de la pandemia del coronavirus nel ámbitu de la música non solo ye y va ser enorme sinón tamién desconocíu porque se trata d’un fechu hasta agora radicalmente inéditu. Magar esta falta de referencies onde comparase, el sector de la música popular yá concretó que’l principal perxudicáu d’esta pergrave crisis ye la música en directu. Y lo mesmo hai que dicir de la clásica.

Albert Salmerón, presidente de l’Asociación de Promotores Musicales y vocal de l’acabante crear Federación de la Música d’España, Ye_Música , qu’arrexunta a nueve de les principales asociaciones del sector, esplica que nun cálculu d’urxencia agórense perdes penriba los 600 millones d’euros pola cancelación y suspensión de conciertos y festivales.

Nel informe, de carís aveséu, lléese que la pandemia “va siguir afectando nos meses de mayor actividá de los conciertos y los festivales de música que tienen llugar ente marzu a setiembre y que cuerren un altu riesgu de ser cancelaos”. Un sector, nun hai qu’escaecelo, el de la música en vivu, clave nel texíu musical magar la progresiva recuperación de los réditos qu’ufierta la música grabada.

El presidente de Promusicae –qu’arrexunta les principales discográfiques–, Antonio Guisasola, amás de coincidir na gravedá del panorama considera que l’escenariu va camudar cuando pasara la crisis: “van camudar radicalmente los vezos de consumu musical, porque’l consumu de música nun va tar ente les necesidaes de la xente. Agora mesmu la vienta física nun esiste, y anque va xubir el consumu, polo que vemos agora mesmu hai un mayor usu de Spotify pero non de pagu, y hai xuna xubida nel YouTube gratuitu”.

Y certifica que los ingresos de les discográfiques anguaño van cayer un 30 per cientu en total (entraes de conciertos, derechos d’autor, vientes de música, etc) en relación a 2019, esto ye, ente 90 y 100 millones.