La educación estremada por sexos afitada pol Constitucional “ye un pasu tras” palos sindicatos

by redacción asturnews | abril 13, 2018 9:17 am

«La educación segregada por sexos ye un pasu tras». Asina califiquen los sindicatos el fallu del Tribunal Constitucional que respuende por que los centros d’esti tipu reciban dineru público.

«Nun esiste la más mínima xustificación para favorecer la educación segregada dende’l puntu de vista pedagóxicu. Sicasí, sí tien numberosos perxuicios, empezando pol refuerzu de los estereotipos sexistes», aseguró Emma Rodríguez, voceru del sindicatu Suatea. Pela so parte, Gumersindo Rodríguez, de Anpe, sofitó esta afirmación y amestó: «Queremos una escuela inclusiva qu’atienda a tolos alumnos nes mesmes y nes meyores condiciones posibles». Los sindicatos consideren que’l fallu del Constitucional nun se correspuende cola realidá actual, na que se pide al profesoráu qu’afonde nos valores coeducativos. «Que sía constitucional nun significa que tenga d’aplicase. El Gobiernu d’España y el del Principáu tienen d’apostar por una enseñanza pública ya igualitaria», abogó Borja Llorente, secretariu xeneral de CC OO.

N’UXT respeten la decisión de los padres qu’escueyan esta modalidá educativa, pero consideren que «teniendo en cuenta que los recursos públicos son llindaos, el so financiamientu nun tendría de realizar se col dineru de toos».

N’Asturies hai dos centros escolares con educación segregada por sexos. La directora del colexu Peñamayor, Josefina de la Fonte, valoró’l fallu del Constitucional que respuende por la posibilidá de recibir financiamientu públicu al traviés de los conciertos, tal que recueye la LOMCE. «Paeznos una bona noticia que se reconoza’l derechu de los padres a escoyer pa los sos fíos el modelu d’educación que crean conveniente», destacó De la Fonte.

Source URL: http://asturnews.com/la-educacion-estremada-por-sexos-afitada-pol-constitucional-ye-un-pasu-tras-palos-sindicatos/