La edición de 2006 del Concursu de Comic y de Tires Cómiques de la Comarca de la Sidra yá tien ganadores

El vienres 15 de payares la Casa la Cultura de Santolaya, Cabranes, a partir de les 19,00 hores, acoyerá la entrega de premios de la IV edición del Concursu de Comic y la II de Tires Cómiques qu’añalmente convoquen los Servicios de Mocedá y Normalización Llingüística de la Comarca de la Sidra. Carolina González y Iván Manuel Olmedo algamen el primer premiu na modalidá de Comic pola so obra “Nel frascu”, el xuráu concedió amás dos accesits a María Margarita Rodríguez pola so obra “Baxun’n cielo” y a David Fernández y José Antonio García pola so obra “La llave”. Les tres obres de comic van ser publicaes nuna revista.

Na categoría de tires cómiques Iván García cola so tira “La yerba” algamó’l primer premiu, quedando como finalistes Lorena Ibaseta con “La princesa Rosa” y Imanol Fernández García por “El guxán, el xabalí y los amiegos, el páxaru y el canariu”.
La obra “El ratu y el gatu” de Mónica Corte, algamó’l primer premiu na categoría del tercer ciclu d’educación primaria. Quedando como finalistes Andrea Cueli, con “La Xana y la fuente sagrada” y Sandra Berros con “La siesta imposible”.
Na modalidá d’enseñanza secundaria el primer premiu correspondió a María Sánchez Díaz, pola tira “El nuestru conceyu”. Como finalistes Belén Marcos con “Enriqueta va a la gueta” y Yésica Corujedo por “De Romería”.