La EBAU va ser los díes 4, 5 y 6 de xunu

Asturies volverá ser anguaño una de les primeres comunidaes en celebrar les pruebes d’accesu a la Universidá. La conocida como EBAU va celebrase anguaño ente’l martes 4 y el xueves 6 de xunu.

Les feches comunicoles oficialmente la vicerretora d’Estudiantes, Elisa Miguélez, delantre mil ochocientos alumnos de segundu de bachilleratu de distintos centros educativos asturianos qu’asistieron esti día a la primera de les trés sesiones d’orientación universitaria entamaes pola Universidá d’Uviéu nel Palaciu de Congresos d’Uviéu. La orde ministerial publicada’l pasáu mes de xineru daba la fecha del 15 de xunu como llende pa llevar a cabu la fase ordinaria de los exames en toa España. N’Asturies, la estraordinaria va tener llugar en xunetu, del 2 al 4, tamién de martes a xueves.

Nun va haber sorpreses pa los alumnos en cuanto al diseñu y les característiques de les pruebes, los temarios nin riegles de puntuación. Per primer vegada desque se dio forma a la EBAU –los primeres n’esaminase según los nuevos criterios fueron los alumnos que concluyeron el Bachilleratu nel cursu 2016-2017– puede falase de cierta estabilización de les pruebes. «Como’l tiempu va asitiando la prueba, tou ye más fácil», destacó Miguélez.

Antes de participar na inauguración de les xornaes d’orientación universitaria, el conseyeru d’Educación y Cultura, Genaro Alonso, punxo de manifiestu qu’el 42 per cientu de los estudiantes de segundu de Bachilleratu asturianos nun tienen claro qué estudios escoyer cuando rematen el cursu, un 21 per cientu decántense polos estudios clásicos como Medicina, les filoloxíes o Derechu», y solo un 12% dicen tar decidíos a cursar disciplines rellacionaes coles Tecnoloxíes de la Información.

A la lluz d’estos datos, el conseyeru destacó la importancia de desenvolver acciones como la que se va celebrar estos díes nel Palaciu de Congresos, onde los estudiantes van poder conocer toles carreres qu’ufierta la Universidá d’Uviéu. Alonso esplicó qu’esta xornada naz pa facilitar l’alcuentru ente los alumnos y les distintes disciplines,  con cuenta d’empobinalos. Pa ello’l rector, Santiago García Granda, considera necesariu «ameyorar» los programes d’orientación non solo empuestos a los alumnos del últimu cursu de Bachilleratu, sinón tamién a etapes educatives previes como Secundaria o inclusive ente los más pequenos. Tamién trabaya la Universidá n’empobinar a les alumnes por que sepan que «pueden estudiar lo que quieran si se-yos da bien y gústa-yos», pa romper asina cola preferencia de les muyeres d’emponer los sos estudios escontra les ciencies sociales y disciplines rellacionaes col cuidu a los demás. Pa García Granda, ye «bien importante» qu’el 50% del alumnáu de carreres de ciencies sían muyeres. «Lo importante ye que cada unu conoza les sos capacidaes y vaiga a aquella titulación pa la que tea meyor preparáu porque va esfrutar más», encamentó.

Precisamente no rellacionao coles capacidaes de los alumnos ye onde’l rector considera más necesariu actuar. Agora mesmu, esplicó, los alumnos y los padres tienen tola información al so algame, pero ye necesariu, por qu’escueyan bien la formación que van cursar, que conozan les sos capacidaes. Asina, esplicó que «non tol mundu, anque tenga bona nota, tien d’estudiar medicina». «La vocación informada ye bien importante», destacó.