La EBAU va empezar el 7 de xunu colos exames de Llingua y Lliteratura y Hestoria

Pa munchos alumnos de segundu de Bachilleratu’l so futuru más inmediatu va decidise en tres xernaes del próximu xunu. Los díes 7, 8 y 9 va desenvolvese n’Asturies la nueva PAU o EBAU, como yá se-y conoz (Prueba d’Evaluación de Bachilleratu y Accesu a la Universidá).

No organizativo, la realización de les pruebes, qu’entienden exames d’ocho materies, nun se separten malpenes de les convocatories d’años pasaos. Asina, van distribuyise en dos exames el primer día, n’horariu de tarde. Una segunda xornada con cuatro examenes de mañana y tarde y una tercera, y última, con dos pruebes mañaneres. Toes van durar hora y media.

Según el calendariu que la Universidá fixo llegar a los alumnos de Secundaria, los exames van empezar el miércoles 7 de xunu, a les 15.45 hores, coles pruebes de Llingua Castellana y Lliteratura II. A les seis de la tarde, van enfrentase a les entrugues d’Hestoria d’España.

La segunda xornada va entamar a les 9,30 coles pruebes de Llingua Estranxera II (alemán, francés, inglés, italianu o portugués) y va siguir, a les 11.45, coles asignatures modales de Fundamentos del Arte II, Matemátiques II, Llatín II o Matemátiques Aplicaes a les Ciencies Sociales II, según la modalidá de Bachilleratu que curse cada alumnu. Pela tarde, la sesión va arrincar a les 15.45 hores con Cultura Audiovisual II, Hestoria del Arte y Xeoloxía, y va siguir a les 18 hores, tres un descansu de media hora, con Artes Escéniques, Xeografía y Bioloxía. La última xornada, la del vienres 9, va sirvir pa demostrar les conocencies en Griegu II, Economía de la Empresa, Dibuxu Técnicu II o Química, a partir de les 9.30. Y va concluyir colos de Diseñu, Hestoria de la Filosofía y Física.

La convocatoria estraordinaria va desenvolvese los díes 4, 5 y 6 de xunetu.