La EBAU del coronavirus ameyora les sos notes

La EBAU del coronavirus ameyora les sos notes
11 xunetu 09:55 2020 Imprimir

La EBAU del coronavirus ameyoró les notes de los bachilleres asturianos y 733 estudiantes llograron una media de 9 o más, el doble qu’en 2019. Inglés sigue siendo un puntu débil n’Asturies: la so nota foi la que menos xubió.

La Evaluación de Bachilleratu pal Accesu a la Universidá (EBAU) d’anguaño, marcada pol coronavirus, rexistra los meyores resultaos dende la implantación d’esti sistema en 2017. Según los datos apurríos ayeri pola Universidá d’Uviéu, la convocatoria ordinaria de xunu llogró la mayor tasa d’ésitu de la so hestoria con un 95,17% d’aprobaos, lo que supon dos puntos y medio más qu’en 2019.

La nota media algamada anguaño de 7,401 tamién supera 7,055 de 2019 y asítiase como la más alta de les cuatro ediciones de la prueba con esta denominación, EBAU. Amás, anguaño llogróse el primera 10 de la EBAU asturiana. Esta ye la calificación máxima de la convocatoria de xunu y bate el récord de 9,95 de 2017 y 2018. Destaca tamién que’l númberu d’estudiantes con nota media igual o superior a 9 doblóse respectu al añu anterior y ye de 733 persones, ente que en 2019 foi de 383. Cabo recordar que tamién la d’anguaño, celebrada ente’l 30 de xunu y el 1 y 2 de xunetu, foi la prueba d’accesu más multitudinaria. Del total del alumnáu matriculáu, 4.373 estudiantes realizaron la fase d’accesu, cerca d’un 18% más que los 3.712 de 2019.

Por asignatures de la fase d’accesu, tamién s’aprecia una significativa xubida de los aprobaos y de les calificaciones medies. En concretu, en Llingua Castellana y Lliteratura II’l porcentaxe d’aprobaos ye del 91,70 %, frente al 88,26 % de xunu de 2019. La nota media ye de 7,59, ente que l’añu pasáu foi de 6,81. N’Hestoria d’España, una de les que más esmolecen a los mozos pola amplitú del temariu, la tasa d’aprobaos ye d’un 84,89%, lo que representa un 11,6% más que l’añu anterior. Tamién equí xube la media más d’un puntu, algamando’l 7,39 frente al 6,38 de 2019.

Lo que evidencian les resultancies ye que l’Inglés sigue siendo l’asignatura con pior resultáu. Anque les resultancies tamién ameyoraron, la evolución, en comparanza con otres asignatures, ye mínima. Anguaño aprobaron inglés el 73,12 % con una nota media de 6,32, ente que nel 2019 fízolo el 73,07 % y la nota media de 6,29. Llatín, una de les materies troncales, presenta’l porcentaxe más baxu d’aprobaos de la prueba con un 65,75%. La so nota media de 6,09 tamién ye de les más baxes. Superar Física que cola so media de 6,03 presenta la nota más baxa de les pruebes. Tamién la so tasa d’aprobaos ye de les más pequenes con un 69,71%.

  Categories: