La diversidá cultural énte la globalización centra’l VIII Salón del Llibru Iberoamericanu

El VIII Salón del Llibru Iberoamericanu inauguróse esta mañana en Xixón nun actu nel que sonaron les voces en defensa de la diversidá cultural y del poder de la palabra énte les pretensiones apobrecedores de la globalización. Per primer vez nesti alcuentru lliterariu un de los discursos institucionales, el que pronunció’l director de l’Axencia Asturiana de Cooperación, Rafael Palacios foi íntegramente n’asturianu, una llingua que xunta otres peninsulares, tamién ta presente ente les propuestes editoriales del Salón.

Luis Sepúlveda, director d’esti alcuentru ente autores y editores d’entrambos llaos del Atlánticu defendió nel actu d’apertura el poder de la palabra pa lluchar contra la inxusticia y la globalización del mundu actual: “tenemos de globalizar la esperanza, la xusticia, el respetu a los derechos humanos y esi ye un papel qu’alcuando tien la lliteratura”. Pa Sepúlveda el Salón xixonés “ye un llugar onde vienen y van idees, idees qu’arriquecen la cultura iberoamericana y la europea” y enfotóse en que la diversidá cultural “espresada equí na xuntanza de la nuestra llingua española xunta la llingua hermana portuguesa y toles otres llingües, pequeñes o grandes, locales y universales, equí amosaes, llogren vencer un mundu nel que namás una forma de pensamientu quier somorguiar a les idees de llibertá”. Nel mesmu sen manifestóse’l director de l’Axencia Asturiana de Cooperación, Rafael Palacios, nun discursu lleíu n’asturianu nel qu’afirmó: “Somos munchos los que cuidamos qu’otru mundu ye posible, onde toos podamos falar na nuestra llingua y onde toles llingües puedan falar, un mundu nel que nun s’impongan les idees, nin se sometan les cultures y los pueblos al peligru globalizador”. Palacios terminó les sos palabres recurriendo a una cita de Federico García

Lorca “voi dicila en castellano, una llingua na que tamién tengo la suerte de poder falar”, afirmó y na que se caltenía’l valir de los llibros como espresión de lo meyor del ser humanu: “cuando lleo un llibru afayo tol dolor y tol enfotu del ser humanu que lu escribió”.

Na inauguración intervinieron tamién el director xeneral de Promoción Cultural y Política Llingüística, Carlos Madera, que remembró’l compromisu que’l gobiernu del Principáu tien col Salón del Llibru Iberoamericanu y con tolos eventos que “como esti arriquecen la cultura d’Asturies y del mundu”. Cerró les intervenciones l’alcaldesa de Xixón, Paz Fernández Felgueroso, que resaltó’l calter de Xixón como “ciudá vivamente comprometía cola cultura, una ciudá abierta, cosmopolita y mestiza” y quiso destacar la celebración de la Fiesta de les Palabres, una de les novedaes d’esta edición que va convertir mañana viernes 13 a Xixón nun festival lliterariu y multidisciplinar con más d’una cincuentena d’actividaes repartíes per otros tantos puntos de la ciudá.

Cincuenta y dos escritores peninsulares y del continente americanu, xunta una veintena d’editores, participen nesti VIII Salón del Llibru Iberoamericanu dedicáu a la diversidá cultural. Una amuesa d’esa diversidá puede atopase nos stands editoriales distribuíos pol patiu del Antigu Institutu de Xixón y nos que se presenten llibros n’español, portugués, italianu, asturianu, aragonés y otres llingües d’una y otra oriella del Atlánticu.