La directiva d’Arribada avanza dalgunos detalles de la edición d’esti añu

19 xunetu 23:50 2007 Imprimir

Redacción.

Xixón va acoyer l’Arribada 2007 a mediaos del mes de setiembre y la direutiva de l’Asociación L’Arribada, organizadora del eventu, dio estos díes un avance de los conteníos. Pa los miembros de l’Asociación “l’Arribada quier perfacese como un foru d’alcuentros, abiertu, modernu y dinámicu, onde les palabres afayen na gratible costa d’esti conceyu, un abellu xenerosu enforma de lliteratura asturiana”.

L’Arribada 2007 sofítenla la Oficina de Política Llingüística del Principáu, la Fundación Municipal de Cultura, Educación y Universidá Popular de Xixón y la Sociedá Mista de Turismu de Xixón y amás tien tamien el sofitu de dellos patrocinadores privaos, como tamien la collaboración de l’Academia de la Llingua Asturiana, Oficina Municipal de la Llingua de Xixón, Ateneu Obreru de Xixón, TC El Garrapiellu, Conceyu d’Estudios Etnográficos Belenos, Grupu San Felix de Candás, Foru Arte Ciudá, Asociación H.a Xareos, Círculu Lliberal, Conceyu d’Escritores Asturianos, Asturies.com, Asturnews, Radio Alma, Cafe del Instituto, L’Aire les castañes, Sala Albeniz, Comunicastur ,Mamatayoe, Random House Mondadori, CH Editorial, Araz Llibros, Ediciones Trabe, VTP, Publicaciones Ámbitu, Suburbia Ediciones, Verdasca, Xera y Senogul, ente otros.

Les meses ‘estrella’ de l’Arribada, titulaes ‘Nuevos rumbos de la lliteratura asturiana’ van centrase esti añu nel esoterismu, la sidra, l’humor, la música y la mitoloxía, a cargu de David Rivas, Xose María Vega, Xose Nel Riesgo, Carlos Rubiera y Alberto Álvarez Peña respeutivamente.

El primer día de l’Arribada abriránse l’espaciu editorial, allugáu nel patiu del CCAI, y una esposición pictórica centrada nos conceptos de palabra y llibertá, que s’asitiará nel vestíbulu de la 2ª planta. Pela tarde, y tras arribar los escritores en barcu al Puertu Deportivu, inauguraráse la presente edición y, de seguío, representantes de los grupos políticos municipales lleerán poemes d’autores en llingua asturiana. Esa mesma tarde presentaráse Vagamar, periódicu del eventu.

Nel trescursu de l’Arribada 2007 presentaránse obres de Xaviel Vilareyo, Xulio Arbesú, Ismael González Arias, Alejandro M. Gallo, Xose Nel Riesgo, Pedro Gálvez, Neto, Aurora García Rivas, Xuan Carlos Crespos, Berto García , Carlos Suari, Antón García, Ruben Sánchez Ardura, Cristina Muñiz Martín, Montserrat Garnacho, Nieves Areces, Pilar Cristina Menendez , Ramona Rodríguez Álvarez “Moncha”, Jose Ángel Gayol, Naciu Varillas, Roberto González-Quevedo, Xurde Fernández, Flavio R. Benito, Javier Rodríguez Blanco, Vicente Sánchez, Xose Ambás y Dani García de la Cuesta.

Presentaránse tamien nuevos númberos de les revistes “Formientu” y “N’ast”, les publicaciones de l’Academia de la Llingua, el proyectu editorial d’Araz Llibros, l’antoloxía de narrativa moza “Vía de serviciu” y la III Antoloxía de cuentios curtios El Garrapiellu.
Na estaya “Tertulies”, falaráse de “Premios lliterarios n’Asturies”, “Xenesis y desarrollu de la novela histórica n’Asturies”, “Promoción y futuru del cómic”, “Xestión cultural y promoción de la lliteratura n’asturianu”, “Promoción de la lliteratura asturiana nos medios de comunicación” y “Identidá y lliteratura, un averamientu al ensayu políticu”. Nes meses redondes de “rumbos”, nes “tertulies” y n’otres actividaes, tarán ente más otros, Ramón d’Andres, L.luis Fernández, Pablo Antón Marín Estrada, Inaciu Iglesias, Chechu García, Lluis Antón González, Antonio Merayo, Xicu Monteserín, Armando Vega, Etelvino González, Adolfo Camilo Díaz, María Xose Rodríguez, Xuan Santori, Alberto Suárez, Miguel Rojo, Lluis Portal Hevia, Roberto González, Inaciu Galán, Jose Luis Rendueles, Milio Rodríguez Cueto, Antón García, Frichu Yustas, Marisa López Diz, Urbano Rodríguez, Vicente García Oliva, Esther Prieto, Próspero Morán, Fernando de la Fuente, Xurde Morán, Iris Díaz Trancho, Ignacio G. López-Dóriga, Pablo Rodríguez Alonso, Ruben Cienfuegos , Mark Ostrowski, Jose Luis Argüelles, Xose Lluis Campal y Xuan Xose Sánchez Vicente.

Habrá espacios p’acordanza y homenaxe de les figures d’Eva González-Quevedo, Enrique García Rendueles y Xose Antón García. “Voces y acentos” sedrá el marcu dedicáu a los recitales poeticos en dos partes, una primera, introducida por Xaviel Vilareyo, correrá al cargu d’integrantes de la nomada “xeneración del compromisu” (autores ñacíos ente 1967 y 1982), y una segunda, “Poetes en Xixón”, tará formada por autores d’estremada procedencia y formación lliteraria que lleerán obres n’asturianu y en castellán. Un espectáculu de declamación, “Con espluma de mar y vieyos minerales”, acompañáu por música d’harpa, dirá poemes de Luis Fernández Roces, Aurelio G. Ovies, Esther Prieto, Fredo de Carbexe, Juan Carlos Gea, Nene Losada, Taresa lorences, Xose Miguel Suárez y Humberto González. Amás d’actuaciones musicales, na Arribada 2007 daráse a conocer el fallu del “Premiu Timón”, distinción empobinada a reconocer la trayectoria lliteraria de los autores asturianos.

El sábadu 22, l’Arribada terminará con una Gala de Pieslle qu’incúi’l 3º Certame de Monólogu Modernu y actuaciones musicales. Con too ello, y dalguna cosa más qu’entá nun se zarrara nel momentu d’escribir estes llinies, l’Arribada 2007 quier afitase inda más na idega de llograr pa la Villa de Xovellanos la capitalidá de la lliteratura asturiana.

  Categories:
Loading Facebook Comments ...