La despidida de Robert Redford estrénase esti vienres

La despidida de Robert Redford estrenase esti vienres nos cines. Tratase de la película ‘The Old Man and the Gun’, de David Lowery, na que’l tamién cineasta de 82 años interpreta a un atracador de setenta y picu, Forrest Tucker, qu’esistió na realidá.

Nel vídeu qu’acompaña a estes llínees Redford apaez nuna de les primeres escenes del llargumetraxe: la del primer picu de Tucker cola so nueva amiga, Jewel, encarnada por Sissy Spacek. L’actor anunció n’agostu qu’ésti sería’l so últimu trabayu. La cinta, presentada na seronda nel Festival de Toronto, va estrenase n’España’l vienres día 25 de xineru.

Redford ye’l lladrón sonriente y caballeroso, qu’escontra’l final de la hestoria revélase amás como lo que de fechu foi tamién el so personaxe real: un gran especialista en fugues. Pos ente los 15 y los 80 años, esto ye, dende’l so primer encarcelamientu hasta la so muerte ente rexes nel 2004, Tucker escapó del so encierre trenta vegaes, “dieciocho con ésitu y 12 ensin ésitu”, según él mesmu declaró.

Redford abandona la escena na gran pantalla habiendo ganao dos Oscars: unu honoríficu y l’otru non como intérprete sinón como meyor director, por ‘Ordinary People’. Otra manera, el noviu de Jane Fonda en ‘Descalzos pol parque’ (1967); unu de los ‘Dos homes y un destín’ (1969) al pie de Paul Newman; ‘El gran Gatsby’ (1974), y ‘El meyor’ (1984) tien toles reconocencies posibles, incluyíu’l de millones d’espectadores de too el planeta a lo llargo de delles xeneraciones.