Portada Educación La Delegación del Gobiernu retira les sanciones a militantes asturianistes pola fuelga de Secundaria

La Delegación del Gobiernu retira les sanciones a militantes asturianistes pola fuelga de Secundaria

by asturnet

La Delegación del Gobiernu da marcha atrás. L’organismu que representa al Executivu central n’Asturies retira los espedientes sancionadores qu’abriera contra militantes asturianistes pola so participación en concentraciones de la fuelga que se convocó na Secundaria el pasáu 10 de payares. Los alumnos afrontaben multes d’hasta 6.000 euros.

Según confirmó güei un voceru de la organización Xunta Moza, estaya de mocedá de la Xunta pola Defensa de la Llingua Asturiana, varios de los estudiantes a los que se-yos abriera un espediente de sanción recibieron yá notificación por corréu ordinariu de que l’acusación queda archivada y ensin efectu, al nun haber llugar a multa dala.

Representantes de la Xunta pola Defensa de la Llingua mantuvieron a primeros d’avientu una xuntanza col delegáu del Gobiernu, el socialista Antonio Trevín, p’analizar los espedientes abiertos contra los participantes na fuelga de la Secundaria, que convocó Xunta Moza pola dignificación de la enseñanza d’asturianu y cuyu actu central foi una concentración énte la conseyería d’Educación, n’Uviéu.

Amás, varios militantes asturianistes afronten inda una denuncia por “llanzar voces contra la comitiva del Gobiernu” con ocasión d’una visita a Cuadonga del presidente autonómicu, Vicente Álvarez Areces, traducida en multes individuales de 300 euros baxo l’acusación d’alterar la seguridá collectiva y orixinar desórdenes na vía pública.

Tamién te podria gustar