La delegación asturiana salía pela nueche pa Lorient

El 35 festival de Lorient 2005 va tener a Llan de Cubel como cabezaleru de la representación asturiana que van completar la Banda de Gaites de Villaviciosa, el grupu Xuno, la Bandina’l Tombu y Skanda. El Festival ta dedicáu esti añu a Irlanda y va desendolcase na ciudá bretona ente 5 y el 14 d’agostu, cuntando cola presencia de The Silencers, Soldat Louis, Yann Tiersen y Carlos Nuñez como artistes más destacaos.

La delegación asturiana nel festival intercélticu de Lorient ye esti añu una delegación enforma completa y recueye a dalgunes de les formaciones a les que más ciñu-y profesa’l públicu bretón, como ye’l casu de los veteranos Llan de Cubel y la Banda Gaites de Villaviciosa. Amás, esti añu ta previsto que la presencia d’Asturies vaya acompangada de dalgunes novedaes con respeutu a otros años, xunta les actividades que se lleven davezu a Lorient como les esposiciones artístiques y culturales.

Esti añu, el festival de Lorient va camudar d’escenarios por mor de les munches obres que se tan faciendo na ciudá, lo que ta obligando a que delles carpes qu’ocupaben les actuaciones cimeres camuden de llugar y que dalgún espaciu como’l pueblu celta nun se mos ufierte como yera tradición. Pa esta 35 edición, la organización tien previsto allugar nel muelle onde s’asitia’l Club K delles carpes de 15×15 que van ufiertase namái que a delles nacionalidaes. Concretamente, eses carpes ocuparánles, sigún desplicó a Asturnews el delegáu asturianu del festivalk, Lisardo Lombardía, el país invitáu d’esti añu, Irlanda, el del añu pasáu, l’Acadíe canadiense, Gales, Bretaña y Asturies.

La actividá cimera del Festival de Lorient será en tou casu como cada añu el Concursu Maccrimmon, en realidá’l Macallan de tola vida, que l’añu pasáu ganara un gaiteru asturianu, Angel Domingo, que por mor d’una perbona interpretación de la música bretona algamó la meyor puntuación del xuráu bretón, tanto nes pieces bretones como nes asturianes y nes gallegues.

Nel Troféu McCrimmon participen esti añu los cuatro gaiteros clasificaos nel memorial “José Remis Ovalle”: Rubén Alba, d’Avilés; Iñaki Sánchez Santianes, d’Uviéu; Marco Antonio Guardado del Valle, de Soto del Barco, y Jorge Suárez Carbajal, d’El Berrón.Na “master class” de gaita que se va celebrar dientro del festival va participar Rubén Alba, y la «Bandina’l Tombo» fadralo nel concursu de folk «Löic Raison».

La delegación asturiana va amuesar tamién los encantos de la tierra y promocionar la sidra con denominación d’orixe. La Sociedá Rexonal de Turismu y El Yantar de Campomanes van encargase del stand qu’Asturies va tener esti añu y amás Caxastur cediera una exposición, “Asturias: arte de un instante” y desenvolveránse delles conferencies como la que ta prevista sobro la historia y evolución de la gaita.

Páxina pa siguir el festival dende Asturnews