Portada Música La delegación asturiana aporta al Festival de Lorient

La delegación asturiana aporta al Festival de Lorient

by asturnet

La delegación asturiana que participa nel Festival Intercélticu de Lorient, cola Banda de Gaites Villa de Mieres y el grupu D’Escarpinos de cabezaleros, coló esti xueves pela nueche pa Bretaña nos autobuses de la organización ente xaréu y música. La delegación salió de la Plaza la Xesta d’Uviéu como ye tradicional a les 10 de la nueche y aportó a Lorient pa xintar y disfrutar de les primeres actuaciones del festival.

El primer día del Festival Intercélticu de Lorient arranca con una completa xornada na que se van poer degustar los más típicos pexes de la Bretaña, mentantu actúen delles de les bandes qu’esti añu amenicen la selmana. A les 20.00 hores, en Port de Páche, dase’l pistoletazu al Festival 2007 con una xinta popular xunta la mary cola presencia de Le Bagad d’Hennebont (la banda más moza de la rexón de Lorient), Les Boucaniers (tradición marina con munchos instrumentos), Bob et Mimosa (un dúo que repasa col su peculiar humor clásicos de la canción de mar) y Union das Terras (dúo gallegu de munchu prestixu por mor de les sos pieces a la gaita y l’acordión).

A partir de les 22.00 en el Espace Marine y por unos 10 euros, podrá disfrutase d’una autentica fiesta del rock, na que participen Frizbee, Red Hot Chilli Pipers y The Mahones. Estes tres bandas van poner el toque de modernidá y ritmo al festival. A esa misma hora, notru allugamientu (Espace Bretagne y de forma totalmente gratuita), danse cita otras tres formaciones: Sron (colos sos sonidos típicamente irlandeses), Krigosse (y les sos influencies jazz) y Pevar Den, que prolongarán la fiesta inaugural a lo llargo de tola nueche.

Tamién te podria gustar