La delda externa declarada culpable de la desigualdá económica y social nel mundu

El IV Alcuentru internacional de Cooperación Asturiana pal Desarrollu acanó esti sábadu cola llectura del veredictu del Tribunal popular sobre la delda externa. El veredictu popular consideró que’l mecanismu de la delda externa sostién la probeza y la desigualdá económica y social nel mundu.
Durante les tres xornaes de vistes el Tribunal Popular escuchó los diferentes argumentos en contra de la delda externa presentaos en tres bloques temáticos, migraciones, muyer y ecoloxía.
L'”acusación particular” a la delda externa formáronla Óscar Natalichio, de la Universidad Popular Madres de Plaza de Mayo, que dixere que “la delda externa incrementóse nun 350% nos últimos años, al tiempu que les migraciones, amuesando les rellaciones ente estos fenómenos”.
Emma Esther González, téstiga hondureña, afitó que “les muyeres somos les principales perxudicaes pela delda, cada vegada tenemos menos accesu a un trabayu xustu y remuneráu, sofrimos pol fechu de ser muyeres, somos quienes más sofrimos nes guerres”. Emma ESther esixó una auditoria interna de la guerres pa certificar que les muyeres son “en realidá les principales acreedores”.
Pedro Ramiro Pérez, Observatorio de Multinacionales en América Latina, que fizo d’acusación particular nel bloque de la delda ecolóxica sorrayó que’l “nuesu modelu de consumu esixe cada vegada un mayor consumu enerxéticu, que ta llevando al saquéu de los recursos naturales de los países del Sur y a la perda de la soberanía alimentaria”.