Portada Sociedá La cultura lideró l’aumentu de los precios en xunu, con una subida de siete décimes

La cultura lideró l’aumentu de los precios en xunu, con una subida de siete décimes

by asturnet

La cultura ye siete décimes más cara n’Asturies que nel mes de mayu, anque mercar productos y servicios culturales cuesta agora nel Principáu un 1,3 por cientu menos qu’a primeros de 2004. Según los datos asoleyaos esta mañana pol Institutu Nacional d’Estadística (INE), la cultura foi la estaya -xunta les bebíes alcohóliques y el tabacu- onde más medraron los precios en xunu, rompiendo la tendencia a la baxa que se rexistraba dende l’empiezu del añu.

La esplicación a talu traballingües pasa per tres cifres concretes: Nel primer semestre de 2004, los precios de los productos d’ociu y cultura reveláronse como los que más baxaron -un 1,3 por cientu- y frenaron la subida xeneral de tarifes, que foi de dos puntos. Esi papel de frenu cumpliólu tamién la cultura na evolución interañal de los precios -variación de los últimos doce meses-, yá que les tarifes nel sector son agora un 0,8 por cientu más barates qu’hai un añu, pero nel mes de xunu desanicióse esa tendencia y rexistróse un aumentu de siete puntos.

L’Institutu d’Estadística espublizó güei l’Índiz de Precios de Consumu (IPC) correspondiente a xunu pasáu, que se traduz nuna inflación acumulada -perda progresiva del valor del dineru no que va d’añu, manifestada nel aumentu de los precios- d’un 2 por cientu.

No que cinca al índiz d’inflación interañal, que mide la evolución de los precios dende xunu de 2003, les perres de los asturianos valen agora un 3,3 por cientu menos a afectos de consumu qu’al empiezu del veranu pasáu.

Datos completos na web del INE

Tamién te podria gustar