La crisis y los recortes faen echar el pieslle d’Ámbitu y la edición dixital de Les Noticies

17 avientu 05:47 2012 Imprimir

Publicaciones Ámbitu ta acabante anunciar la fin de la so actividá editorial dempués de más de 16 años. La empresa editora de Lesnoticies.com y hasta non va muncho de la edición en papel d’esi mesmu periódicu, prescinde de tola plantilla por razones económiques. Según espliquen “la crisis que vive’l nuestru país fai inviable la pervivencia d’esti mediu dixital, que se convirtió nun referente de la comunicación n’asturianu”. Una nota de prensa y una carta del so fundador, Inaciu Iglesias, pon fin a l’actividá d’esta editorial y esti mediu de comunicación.

Ente les razones del pieslle espliquen “la mengua tremenda de los ingresos por vía publicitaria y de les ayudes públiques al usu del asturianu”. Una mengua denunciada estos meses atrás por organizaciones como la Xunta pola Defensa de la Llingua Asturiana o Iniciativa pol Asturianu y que tán llevando per delantre esperiencies con bien d’años al llombu.

Publicaciones Ámbitu agradez tamién na nota “a los sos llectores, anunciantes, collaboradores y trabayadores de toos estos años el papel que xugaron pa que tanto Les Noticies como LESNOTICIES.COM vieren la lluz y cumplieren cola so periodicidá”. Nesti sen, la empresa diz: «Gracies a una inciaciativa privada y al apoyu de les instituciones y de la sociedá asturiana, fuimos quién –toos en xunto– a dotar a Asturies d’un mediu de comunicación n’asturianu. Con esta experiencia colectiva arriquecimos el nuestru pasáu recién y dexemos el camín abiertu pa que, nel futuru, otros profesionales puedan facer y sigan faciendo comunicación profesional n’asturianu».

Publicaciones Ámbitu anunció amás que va editar en feches próximes dellos llibros que tan dientro de la so planificación y, tres d’ello, va acabar tamién cola so actividá editorial y discográfica, “anque los sos fondos editoriales y discográficos van siguir comercializándose en llibreríes y tiendes de discos”.

(03/02/2012) Les Noticies diz adiós a los quioscos esti vienres

  Categories:
Loading Facebook Comments ...