La creación d’una tarxeta ciudadana encabeza n’Uviéu les votaciones de los presupuestos participativos

La creación d’una tarxeta ciudadana encabeza n’Uviéu les votaciones de los presupuestos participativos
27 setiembre 16:27 2017 Imprimir

Un total de 17 propuestes, con 12.000 votos emitíos, van incorporar al presupuestu municipal de 2018 en superando la última fase del procesu, con iniciatives qu’afecten a tola ciudá y colos proyectos educativos, ente los más votaos.

La ciudadanía uvieina pudo participar na ellaboración de los presupuestos del conceyu per primer vegada na hestoria, en virtú del proyectu de presupuestos participativos puestu en marcha pola Conceyalía de Participación, Información y Tresparencia que dirixe la vicealcaldesa Ana Taboada nel Conceyu d’Uviéu.

Na fase final de votaciones, que se desenvolvió ente los díes 6 y 21 de setiembre, participaron 1.602 persones mayores de 16 años con un total de 11.971 votos emitíos a les 21 propuestes que superaron la fase de viabilidá técnica. De toles iniciatives vidables, 17 d’elles superaron la fase de votación y van ser incluyíes nel presupuestu del próximu añu pa la so execución. Los participantes nel procesu tamién amosaron el so sofitu a otres trés propuestes más, a costu cero, que se van treslladar a les distintes conceyalíes competentes por que puedan analizar el so desenvolvimientu.

La propuesta más votada polos ciudadanos, con un total de 791 votos, ye la creación y puesta en funcionamientu de la tarxeta ciudadana d’Uviéu, con un costu de 125.000 euros. Al igual qu’esta propuesta, toles qu’ocupen los primeros puestos na llista d’iniciatives más votaes son les qu’afecten al conxuntu de la ciudá. D’esta miente, les siguientes más votaes, por esti orde, son: instalación de desfibriladores en centros públicos (777 votos), instalación de xardinos verticales y aumentu de zones verdes (682 votos), instalación d’aparcamientos pa bicicletes en dellos puntos de la ciudá (590 votos). Amás, un total de dolce propuestes sumaron más de 500 sofitos, ente otres la ellaboración d’un estudiu pa conectar por aciu una rede de dos tales Cualloto y Ventanielles (587 votos), la instalación d’aseos na Pista Finlandesa (586 votos), o la implementación d’una rede de voluntariáu nel albergue d’animales (507 votos).

Tamién llama l’atención que, ente les propuestes que tuvieren más sofitos ciudadanos atópense toes aquelles que tienen que ver cola educación y la meyora de redolaes escolares. Por casu, salieron adelantre’l proyectu pal zarru de la cancha deportiva del Colexu Poeta Ángel González y la meyora d’accesos al Colexu Dolores Medio.

 

  Categories: