“La Corredoria Vive los Llibros” llega al Mercáu de Abastos del barriu’l día 9

“La Corredoria Vive los Llibros” llega al Mercáu de Abastos del barriu’l día 9
07 marzu 09:51 2018 Imprimir

La conceyala d’Educación y responsable de la área de Biblioteques d’Uviéu, Mercedes González, presentó esti llunes “La Corredoria Vive los Llibros”, una “actividá pionera que surde de la sociedá civil”: concretamente de l’asociación vecinal Vive La Corredoria, cola que s’escuerre dinamizar el barriu y faer protagonistes a los vecinos y colectivos de la zona dende’l día 9 de marzu.

Un acontecimientu que se va celebrar los díes 9, 10 y 11 de marzu, nel Mercáu de Abastos de La Corredoria, “cola so exa fundamental nos llibros (…) pero que va dir muncho más allá d’una feria” yá que el so principal oxetivu ye “recuperar la vida nel barriu”.

Al pie de la edil, Valentín Sánchez de l’asociación Vive La Corredoria, y Chelo Veiga, coordinadora de la Rede Municipal de la Biblioteques, esplicaron el programa que se va desenvolver mientres toa esta fin de selmana, nel que van tar bien presentes el autores del barriu y les editoriales asturianes, y qu’inclúi “actividaes para toles edaes”.

Esti vienres, “La Corredoria Vive los Llibros” va inaugurase a les 17:30 hores con un conciertu al cargu de la Escuela de Música del Conceyu d’Uviéu, y a lo llargo de la tarde asocederán talleres de cómic, presentaciones de llibros (“Asturies con neños” de María Cañal, “Femenín Plural” de Dorita García y “Nós los Rivero” de la editorial d’Ánxeles Casu) y xuna mesa redonda sobre edición d’arte.

L’actividá tamién va empezar el sábadu con música, col grupu de percusión El Cortixu. De siguío Ana Morán va ufiertar un cuentacuentos para los más pequenos y va celebrase la mesa redonda titulada “Cómo visibilizar la lliteratura asturiana”. Darréu va presentase la colección Tenebre y los llibros Terror ensin llendes y Cuentos Góticos d’Emilia Pardo. Yá pela tarde, va celebrase un recital poéticu (a partir de les 17:15 hores), una mesa redonda sobre’l xéneru negru asturianu” nel que van participar Ignacio del Valle y Carlota Suárez y va presentase la obra “La clausa” de David Barreiro.

A lo llargo del domingu podrá esfrutase de la presentación de la serie “Una forma nueva de dormir” del psicólogu suecu Carl-Johan Forssén, y de les obres El neñu de la lluz de plata de Bubisher y Gonzalo Moure y “En mar abiertu” d’Eduardo Romero. Amás va celebrase un taller de mandalas, va falar de la “Biblioterapia” y va celebrase xuna mesa redonda sobre’l llibru El derechu humanu a la paz y a la inseguridá humana. Yá pela tarde habrá xuna mesa redonda titulada “La lliteratura al llau de casa”, va celebrase xuna degustación arriendes de la presentación de “Asturies cocina de proximidá” y van entregase los premios del concursu de microrrelatos.

  Categories: