La Corporación de Xixón xúnese pa reivindicar el nuevu grau d’Inxeniería na EPI

La Corporación de Xixón xúnese pa reivindicar el nuevu grau d’Inxeniería na EPI
15 xineru 10:17 2018 Imprimir

La xunta de voceros llegó esta selmana pasada a un consensu sobro la declaración institucional cola que’l Plenu del Conceyu va solicitar a la Conseyería d’Educación y a la Universidá d’Uviéu que lleguen a un alcuerdu que faiga posible la implantación d’estudios d’Inxeniería d’Organización Industrial nel campus xixonés.

El testu entá nun ye definitivu, va terminar de perfilase esti llunes, pero la intención de los seis grupos municipales ye d’averar postures, «aparcando los intereses partidistes», según señaló Mario Suárez del Fueyo, de Xixón Sí Puede, el primeru en referise al mentáu alcuerdu.

Foi XSP la primera en presentar una declaración institucional pa reclamar el grau refugáu pola Conseyería d’Educación. Nel testu inicial, aludía a cómo «el campus xixonés formó a xeneraciones de profesionales que contribuyeron de manera decisiva al desenvolvimientu d’Asturies» y a cómo la nueva titulación «va aumentar les sos potencialidaes y les posibilidaes pal alumnáu». Y sorrayaba que, cola so decisión, «Educación taba convidando a los estudiantes a cursar estos estudios fora de la comunidá».

Con posterioridá, PSOE ya IX sumaranse a la declaración, qu’incorporó les sos aportaciones y resultó ser más conciliadora. Nella encamentaben a dambes partes a «definir un proyectu vidable pa enllantar esta enseñanza y qu’apurra una diferenciación abonda pa faela curiosa a los estudiantes ya impulsar la nuesa actividá granible ya investigadora». Ciudadanos -que presentara una proposición, como lo fixera tamién el PP- espresó antieri la so disposición a sofitar el testu si había cambeos. Dende’l so puntu de vista, la declaración de los grupos d’izquierdes daba a entender que «la Universidá fixera un mal planteamientu», daqué que nun compartía, anque reconocía que faía falta «diálogu» per dambes partes, «dende’l respetu al ámbitu competencial de caúnu y l’autonomía universitaria». El PP plantega que dientro d’esta enseñanza dea prioridá a un títulu de grau o máster.

 

  Categories: