La convocatoria de B2 y C1 de Llingua Asturiana resultó un ésitu

La convocatoria de B2 y C1 de Llingua Asturiana resultó un ésitu
17 avientu 09:12 2021 Imprimir

La segunda convocatoria de certificación de los niveles del MCERLL B2 y C1 de Llingua Asturiana resultaron otra vuelta un ésitu de participación con una demanda muncho superior a les places ufiertaes pal nivel Intermediu.

L’enfotu primeru d’estes pruebes de certificación foi dar continuidá y respuesta a la demanda pergrande per parte de la sociedá d’unes pruebes que siguieren los mesmos criterios que cualesquier otru idioma. Asina, d’acordies coles pautes del decretu qu’establez los niveles de competencia, entamáronse esti añu pruebes pal nivel Intermediu B2 y Avanzáu C1. La Facultá de Formación del Profesoráu ufiertó’l 9 d’ochobre les sos instalaciones pal bloque de pruebes escrites (bloque 1) . La sede pa les pruebes orales (bloque 2) dende’l 18 d’esi mes foi l’IES Alfonso II de Uviéu.

El serviciu d’Ordenación Académica, de la Conseyería espublizó esti añu una guía-protocolu pa les persones inscrites qu’aclara cada parte de la prueba. Arriendes d’ello, llibera pruebes escrites del añu anterior que valen bien pa practicar.

L’interés que xeneraron estes pruebes foi peraltu, rexistrándose 433 solicitúes pal nivel Intermediu B2 y 201 pal nivel Avanzáu C1. Estableciérase un cupu de 300 solicitúes pa cada nivel na preinscripción, escoyíes por cuenta de los criterios de escolarización (lletra del apellíu). Al final 476 persones foron almitíes darréu del pagu del preciu públicu (283 pal nivel B2 y 193 pal C1).

La calificación final d’aptitú algamábase tres superar les 5 destreces llingüístiques con una media global de 6. Nel nivel B2, un 62% de les persones presentaes fixéronlo, lo mesmo qu’un 82% nel nivel Avanzáu C1. Los niveles esaminaos tuvieron perbien permediaos, sicasí alvirtióse de forma xeneral que namás un porcentax pequeñu d’esaminaos lleera les indicaciones publicaes nel protocolu col conteníu cada parte de la prueba y qu’ello pudo influyir nos resultaos finales.

La Conseyería d’Educación contempla yá la convocatoria pal añu 2022 que debería ufrir otra vuelta los niveles B2 y C1 de Llingua Asturiana y siguiendo les pautes de les convocatories pasaes.

  Categories:
Loading Facebook Comments ...