Portada Educación La Conseyería d’Educación preve convocar oposiciones de Primaria’l próximu añu

La Conseyería d’Educación preve convocar oposiciones de Primaria’l próximu añu

by redacción asturnews

La Conseyería d’Educación preve convocar oposiciones en Primaria’l próximu añu  y fadralo primero que remate’l cursu pa disponer asina de «más tiempu y aselu» y evitar posibles erros como los producíos n’anteriores convocatories.

Foi lo qu’avanzó esti día Genaro Alonso demientres una comparecencia na comisión d’Educación y Cultura na que tamién faló de los interinos (a pidimientu de Podemos) y de les escueles de 0 a 3 años (a instancies d’IX). Reconoció’l conseyeru que l’anunciu de les oposiciones ye entá «prematuru», pero non por ello dexó pasar la oportunidá d’apurrir delles claves. Como que la so intención ye que la convocatoria tome «toles especialidaes posibles» y que pueda algamar la «máxima» tasa de reposición, esto ye, la incorporación del mayor númberu d’efectivos posibles en función del númberu de baxes rexistraes l’añu anterior. Nesti sentíu, recordó que l’últimu procesu d’oposiciones, el del pasáu xunu, dexó que la tasa d’interinidá na trentena d’especialidaes convocaes amenorgar del 26 al 11%.

La Xunta Xeneral aprobó’l 19 de febreru d’anguaño una proposición non de llei -a propuesta de Podemos y col sofitu del Partíu Popular y Foro Asturies, y parcialmente d’Izquierda Xunida y Ciudadanos- que reclamaba que la Conseyería d’Educación abriera la negociación d’un nuevu alcuerdu de profesoráu interín n’Asturies opuestu al qu’anguaño ta a valir.

El responsable d’Educación entiende que l’actual alcuerdu «tien aspeutos bien positivos», ente ellos igualar a un 40% la nota de la oposición y la puntuación de la esperiencia. «¿Taría dispuesta a xubir la esperiencia llaboral a un 60%?», preguntó-y Alonso a Montejo.

Al respective de la etapa educativa de 0 a 3 años, Alonso reivindicó la necesidá de disponer de presupuestos rexonales pa 2017 que dexen al so departamentu ampliar la etapa educativa cola inclusión d’esti ciclu, que cunta con 65 escueles en 38 conceyos, según los datos qu’espunxo ayeri en see parlamentaria. La prórroga presupuestaria, argumentó, condiciona la meyora» del financiamientu pa estos centros. Negó amás el conseyeru qu’esista «fragmentación» del ciclu na etapa de cero a tres años. Sobre esti puntu señaló qu’el so departamentu sigue trabayando na posibilidá d’allugar nueves aules nos centros d’Infantil y Primaria que dispongan de locales disponibles. Ye daqué qu’asocede yá con 26 de les actuales escueles de 0 a 3 años.

Tamién te podria gustar