La Conseyería de Xusticia va participar nos actos del Saint Patrick’s Day en Nueva York

La Conseyería de Xusticia, Seguridá Pública y Rellaciones Esteriores y l’Axencia d’Emigración tán convidaes a participar nes xornaes sobre la cultura asturiana qu’organiza la Pace University de la ciudá americana. Les xornaes van desendolcase los díes 16 y 17 de marzu nel Campus de la universidá. La delegación asturiana que va participar nes xornaes ta compuesta pola Academia de la Llingua Asturiana, ASUSA (Asturianos en USA), ASMA (Asturianos en Madrid), asina mesmo va participar una delegación del Ministeriu d’Educación y Ciencia español.

Les xornaes van centrase nuna visión cultural y social d’Asturies onde la llingua, la lliteratura, la música tradicional, la emigración asturiana y el papel de les muyeres asturianes van centrar la primer de les xornaes.
La segunda xornada va empobinase a la proyección de dellos documentales sobre Asturies, ente ellos L’Asturianu: Historia d’una Llingua.

El día 17, San Patricio, la representación d’asturianos en USA, xunta coles bandes de gaites de Corvera y Villa de Xixón, van marchar peles principales cais de Nueva York dientro de los programes de la celebración del Sant Patrick’s Day pola comunidá irlandesa de la ciudá americana.