Portada Sociedá La Conseyera d’Educación nun participa na inauguración de la UABRA

La Conseyera d’Educación nun participa na inauguración de la UABRA

by asturnet

Esti llunes inauguróse en Cangas del Narcea una edición nueva de la Universidá Asturiana de Branu (UABRA), entamada pola Academia de la Llingua Asturiana (ALLA), la Universidá d’Uviéu y el Conceyu de Cangas. Na inauguración participaron, como ye vezu, nel actu tuvo presente’l director del cursu, Xosé Antón González Riaño, la presidenta de l’ALLA, Ana Cano, l’alcalde de Cangas y un represenante de la Estensión Universitaria. Sicási esti añu nun tuvo presente la Conseyera d’Educación y Cultura, Ana González, que l’añu pasáu comprometiérase nesti mesmu marcu a tener avanzada una solución que permitiera al profesoráu d’asturianu tener reconocida la especialidá, lo que permitiría convocar oposiciones con normalidá y evitar la eterna interinidá que viven anguaño.

Nel so llugar tuvo Ana Fueyo, Directora Xeneral de Política Llingüística, que nun dio nenguna esplicación sobre l’ausencia de la Conseyera, anque si mandó un saludu nel so nome. Tampoco dio esplicación dala sobre la situación d’esti asuntu prometíu pola Conseyera l’añu pasáu.

Ana Cano faló de la importancia d’estos cursos, nos qu’esti añu collabora CaxAstur y ALSA como patrocinadores y recordó l’ésitu de poder llevar alantre tolos cursos pa los que s’abrió matrícula, per primer vegada. En total participen nos cursos, que se celebren na Escuela Llar de Cangas, 170 persones ente alumnos y profesores, con cursos d’asturianu pero tamién d’otres cuestiones, como internet, la xestión cultural, la hestoria… siempres col asturianu como llingua vehicular.

Dempués de la presentación, na Casa Cultura de Cangas, presentóse nesi mesmu llugar una esposición entamada por mor de la UABRA y dedicada a la ropa traidicional. Xandru Armesto, del Grupu San Félix de Candás, qu’entama esta amuesa, fizo de presentador con un paséu d’alumnos y autoridaes peles distintes partes de la mesma.

Tamién te podria gustar