La Conseyera de Presidencia, Xusticia ya Igualdá garantiza “la continuidá y potenciación” de la Escuela de Branu d’Asturianía”

Apoyu inequívocu del Gobiernu del Principáu d’Asturies a la Escuela de Branu d’Asturianía y a la puesta en marcha d’otres iniciatives pa implicar a la mocedá nos Centros Asturianos fueron los dos principales mensaxes de la Conseyera de Presidencia, Xusticia ya Igualdá, María José Ramos nel pieslle del primer cursu de la tercer promoción d’esta Escuela.

L’actu desendolcóse na Casa de Cultura de Nava y contó, ente otres munches persones, cola asistencia del Alcalde d’esti conceyu, Caludio Escobio, el Viceconseyeru de Seguridá, Emigración y Cooperación al Desarrollu, Valentín Ruiz García, el Presidente del Conseyu de Comunidaes Asturianes, Manuel Fernández de la Cera, la Directora de l’Axencia Asturiana d’Emigración María Eugenia Álvarez, el Presidente de la Federación de Centros Asturianos (FICA), José Luis Casas, el Presidente del Club Tinetense, Venancio Blanco, asina como los presidentes o representantes de los Centros Asturianos de Buenos Aires, Brasil, Caracas, Suiza, Bilbo, Alcobendas, Alicante, Tres Cantos Castellón, Málaga.

La Escuela de Branu d’Asturianía ye un programa formativu, organizáu dende l’añu 2002, pol Conseyu de Comunidaes Asturianes que depende de la Conseyería de Presidencia, Xusticia ya Igualdá. El so oxetivu ye formar a emigrantes y descendientes d’emigrantes pa que depués puean exercer de monitores de cultura y música tradicional asturiana nos sos centros respectivos.

El programa inclúi 300 hores llectives, distribuyíes en trés cursos o niveles a facer per trés años consecutivos , depués entréguen-yos el diploma que los acreita como monitor/a. A la fecha entregáronse 45 diplomes: 20 na primer promoción y 25 na segunda.

Nel cursu que güei pieslla, el primeru de la tercer promoción, tán participando 27 persones procedentes de Centros Asturianos d’Arxentina, México D.F, Uruguay, Chile, Nueva York, Suiza y delles comunidaes autónomes asturianes.

La Conseyera de Presidencia, Xusticia ya Igualdá, María José Ramos, felicitó al profesoráu pol trabayu fechu, pero sobre too a los alumnos y alumnes pol aprovechamientu que fixeron d’esta esperiencia formativa. Destacó que’l tiempu demostró que la puesta en marcha de la Escuela de Branu d’Asturianía foi una decisión acertada pola qu’hai que siguir apostando. Como muestra de que, tanto los Centros Asturianos como la sociedá en xeneral comparte esta apreciación, refirióse a la decisión de la Federación Internacional de Centros Asturianos (FICA) de conceder la Carabela 2008 a esta Escuela. El galardón va entregase’l miércoles próximu, 5 d’agostu, nel Centru Antiguu Institutu de Xixón.

La Conseyera enmarcó la Escuela d’Asturianía dientro de”la importancia que’l Gobiernu del Principáu d’Asturies otorga a la nuesa población emigrante, intensificando esfuercios pa que, anque seya dende la distancia xeográfica, toles asturianes y asturianos tean implicaos na vida social, económica, política y cultural de la so tierra.”.

Destacó que, especialmente dende l’añu 1999, se vien faciendo un esfuerciu importante por incrementar recursos nesta dirección y frutu d’ello son los Planes Integrales d’Emigración. Recordó que’l Conseyu de Gobiernu dio esta mañana’l preste al III Plan d’Emigración con una previsión de 18 millones d’euros pa poner en marcha actividaes ya iniciatives a lo llargo de cuatro años, empobinaes especialmente a dos segmentos de población: los mayores y la mocedá.

Añadió que tol equipu de la Conseyería con responsabilidaes en temes d’emigración –tanto’l Viceconseyeru, la Directora de l’Axencia Asturiana d’Emigración, el Presidente del Conseyu de Comunidaes y ella mesma– tienen claro que, a lo llargo d’esta llexislatura, gran parte del nuesu esfuerciu tien que concentrase en promover, impulsar el papel de la mocedá porque “la suerte y el futuro de los centros asturianos, destacó, depende, sobre too, de que conectemos coles preocupaciones y proyectos de la nuesa, en definitiva coles vuestres inquietúes”.