La conseyera de Presidencia, Xusticia y Igualdá presenta un presupuestu “inversor dafechu”

19 04:58 2007 Imprimir

La conseyera de Presidencia, Xusticia y Igualdá, María José Ramos, aseguró esti llunes que’l presupuestu de la so conseyería ye “inversor dafechu” y destacó del mesmu l’incrementu del 125% n’inversiones n’infraestructures”. Pela so parte IX calificó les cuentes d’esta conseyería de “frustración, que significa vuelta p’atrás y contién importantes señales de fraude”, mientres que’l PP aseguró que la comparecencia de Ramos nun ofrez “nada nuevu” porque nun se prevé nada nuevu nel proyectu presupuestariu.

La conseyera de Presidencia, Xusticia y Igualdá, María José Ramos, foi la encargada d’abrir esti llunes el turnu de comparecencies de los miembros del Executivu Autonómicu pa dar cuenta na Xunta de les partíes de les sos respectives conseyeríes nel proyectu presupuestariu pal 2008.

María José Ramos recordó que nel 2007 la celebración de les elecciones llocales y autonómiques fizo que nos presupuestos d’esti añu recoyera una partida de 2,7 millones sólo pa esi asuntu. Asina, si se resten esa cantidá, l’aumentu “real” diba ser del 9,85% y non el 6,8% aparente.

Los presupuestos de Presidencia, Xusticia y Igualdá presenten pal 2008 una cifra global de 104.246.916 euros, un 6,81%. Por árees, destínense 30,5 millones a Xusticia, 5,3 a Igualdá, 14,1 a Interior, 30,1 a Seguridá Pública, 3,6 a Emigración, 14,1 a Cooperación al Desarrollu, 1,9 a relaciones cola Xunta Xeneral del Principáu y 4,2 pa Servicios Xenerales.

En materia d’Igualdá, la Conseyera señaló que’l presupuestu pal Institutu Asturianu de la Muyer sube a 5,3 milones, dalgo que nun supón un cambiu cola cifra del añu pasáu, pero utilizando’l mesmu argumentu, recordó que nos años 2006 y 2007, les cuentes recoyíen l’entamu de la Casa Malva de Xixón, polo que sí qu’hai un incrementu.

Polo que se refier a Xusticia, comentó que’l presupuestu del 2008 va ser de 30,6 millones, lo que representa un incrementu del 36,35%. Comentó que la principal razón ye l’entamu de nueves infraestructures per tol territoriu, con una cantidá de 8,6 millones, lo que suponen un incrementu del 125% y que van dar llugar a la materialización de proyectos como’l del Institutu de Medicina Llegal (un millón pal 2008), el Palaciu de Xusticia de Xixón (un millón pa la llicitación del proyectu), les obres de les nueves sedes xudiciales de Villaviciosa, L.luarca y Pravia (1,8 millones) y la redacción de diversos proyectos (390.782 euros). El presupuestu de Cooperación al Desarrollu, pela so parte, garantiza’l caltenimientu del 0,7% de los recursos propios del Principáu, mientres que les tresferencies a 112 y Bomberos d’Asturies pasen de 27,8 a 29 millones d’euros.

  Categories:
Loading Facebook Comments ...