La Conseyera d’Educación comprométese a llograr la reconocencia del profesoráu d’asturianu

La Conseyera d’Educación y Cultura, Ana González, comprometióse nel actu d’entamu d’inauguración oficial de la Universidá Asturiana de Branu (UABRA) a “regularizar al profesoráu d’asturianu, tanto de Primaria como de Secundaria” a lo llargo d’esta llexislatura, dempués d’una petición directa y pública de la Presidenta de l’Academia de la Llingua Asturiana, Ana Cano. Nun discursu que tuvo muncho de político y sentimental, al mesmu tiempu, la Conseyera recordó como llevara a los sos fíos a clases d’asturianu na escuela, y como ella mesma participare nos cursos de branu de l’ALLA nos años ochenta. La presidenta de l’Academia dixo “aguardar por meyores rellaciones” con esta nueva alministración, en comparanza col gobiernu saliente.

En cuantes a la regularización del profesoráu, la Conseyera esplico tar “convencida que l’añu qu’entra, que voi tar equí, taremos falando d’eso, porque igual tovía nun ta finao, pero podremos dicir que tamos dando los pasos necesarios pa regularizar al profesoráu d’asturianu, tanto de Primaria como de Secundaria”. La decisión ta nel gobiernu del estáu y tolos grupos parllamentarios amosaron la necesidá de que se dea esi cambiu, pero la decisión acumula un retrasu de décades.

Nel actu, celebráu nel Palaciu d’Omaña taben, amás de les citaes, el director de los cursos de la UABRA, Xosé Antón González Riaño; el vicerrector d’Estención Universitaria, Vicente Domínguez García; y l’alcalde de Cangas del Narcea, José Luis Fontaniella Fernández.